"Gürcüstan üçün faciəvi tarixdən 30 il keçir. Günahsız gənclər Gürcüstanın azadlığı, müstəqilliyi və gələcəyi uğrunda öz həyatlarını qurban veriblər".
Bu sözləri ONA-ya açıqlamasında Gürcüstanın Azərbaycandakı səfiri Zurab Pataradze deyib.
Z.Pataradze qeyd edib ki, 9 aprel gürcü xalqı üçün həm faciə, həm də qürur günüdür.
Səfir vurğulayıb ki, 9 aprel 1989-cu il hadisəsinin 30-cu ildönümünü dost və strateji tərəfdaş Azərbaycanda qeyd etmək əlamətdar hadisədir:
"XX əsrdə iki qonşu xalq müstəqilliyi qazanmaq üçün çətin yollardan keçib və oxşar hadisələrə məruz qalıb. 9 aprel və 20 yanvar - iki qonşu xalqın böyük faciələridir. Bizim xalqlarımız eyni dərdi bölüşür. Xalqlarımız bu faciələr zamanı həyatını qurban vermiş qəhrəmanları həmişə xatırlamalıdır".
Qeyd edək ki, 1989-cu ilin aprelin 9-da Sovet ordusu Gürcüstanın paytaxtı Tbilisidə müstəqillik tərəfdarlarının mitinqini dağıdıb. Nəticədə qadınlar və gənclər də daxil olmaqla 21 nəfər həyatını itirib.
çap et