XALQ ŞAİRİNİN KÜLLİYYATININ TƏQDİMATI KEÇİRİLİB
Mədəniyyət və Turizm Nazirliyinin təşkilatçılığı ilə ümummilli lider Heydər Əliyevin 90 illik yubileyinə həsr edilmiş III Bakı Beynəlxalq Kitab-Sərgi Yarmarkası tədbiri çərçivəsində Xalq şairi Zəlimxan Yaqubla oxucuların görüşü oldu. Tədbiri giriş sözü ilə açan “Şərq-Qərb” nəşriyyatının direktor müavini Rafiq Kazımov qonaqları salamlayıb, Zəlimxan Yaqubun yaradıcılığı haqqında danışdı. Oxuculara Zəlimxan Yaqubun əsərlərinin on üç cildliyi haqqında məlumat verildi. Bildirildi ki, I-VII cildlərdə şeirlər, VII-XI cildlərdə isə müxtəlif illərdə yazılmış qırx poema yer alıb. Külliyyatın XII-XIII cildlərində Zəlimxan Yaqubun ictimai-siyasi və dövlət xadimlərinə məktubları, rəsmi dövlət tədbirlərindəki çıxışları, kütləvi informasiya vasitələrinə verdiyi müsahibələr çap olunub. Xalq şairinin görkəmli ədəbiyyat və sənət adamlarına açıq məktubları, onlar haqqında xatirələri, ayrı-ayrı müəlliflərin kitablarına yazdığı ön söz və rəylər, ozan-aşıq sənəti ilə bağlı düşüncələri və digər yazıları toplanıb. Xüsusilə, VII cildə şairin bugünə qədər heç bir yerdə çap olunmayan şeirləri əlyazmalar əsasında tərtib edilib.
Tədbir regional tərkib baxımından zənginliyi ilə seçilirdi. Xalq şairinin görüşünə müxtəlif bölgələrdən, Cənubi Azərbaycandan gələn oxucular vardı. Bədii qiraət ustası Ağalar Bayramov şairin şeirlərini oxudu. Aşıq Ramil şairin bir neçə şeirini saz havası üstə oxudu. Gənc şair Anar Amin Zəlimxan Yaqubun ədəbiyyatımızda uca bir zirvə olduğunu, ədəbiyyata yeni gələn yazarların ondan öyrənmələrinin vacibliyini vurğuladı və onun şeirlərindən birini səsləndirdi.
Daha sonra çıxış edən Zəlimxan Yaqub tədbiri təşkil edən, onun görüşünə gələn hər kəsə təşəkkürünü bildirdi. Nizaminin adını daşıyan bir küçədə oxucularla görüşməkdən məmnun olduğunu deyən Xalq şairi “Dahiləri belə gördüm” adlı silsilə şeirlər yazdığını, bu silsilədə Nizami, Xaqani, Qazi Bürhanəddin, Xətai, Nəsimi, Füzuli, Vaqif, Hadi, Hüseyn Cavid və digər şairlər haqqında şeirlərinin yer aldığını vurğuladı. Tədbirin sonunda Zəlimxan Yaqub oxuculara imzalı kitablarını hədiyyə etdi.
RAMİL
çap et