Çin: "Qarşılıqlı rüsumların tətbiqinə dair əsuliyyət ABŞ üzərinə düşür"

"Çinlə ABŞ arasında qarşılıqlı rüsumların tətbiqinin nəticələri ilə bağlı bütün məsuliyyət ABŞ-ın üzərinə düşür".

“Report” xəbər verir ki, bunu Çinin Kommersiya Nazirliyi ABŞ prezidenti Donald Trampın sentyabrın 1-dən etibarən daha 300 milyard dollarlıq Çin malına 10%-lik gömrük rüsumu tətbiq ediləcəyi barədə ötən gün verdiyi açıqlamanı şərh edərkən bəyan edib.

Bu addımın Osakadakı G-20 sammitində əldə olunmuş ikitərəfli razılaşmadan geri addım olduğunu qeyd edən nazirlik ABŞ tərəfinin ticarətdə gərginliyi artırmasının dünya iqtisadiyyatına mənfi təsir göstərəcəyini vurğulayıb:

“Ticarət müharibəsində qaliblər ola bilməz”.

Xatırladaq ki, bu ilin may ayında ABŞ hökuməti 200 milyard dollarlıq Çin malına rüsumları 10%-dən 25%-ə qaldırmış, Çin hökuməti isə bu il iyunun 1-dən 60 milyard dollarlıq ABŞ malına rüsum tətbiq etdiklərini bildirmişdi. İyul ayının axırında Osakada keçirilmiş G-20 sammitində iki ölkə liderlərinin görüşü zamanı ABŞ prezidenti məqbul ticarət razılaşmasına hazır olduqlarını bildirmişdi.