Azərbaycandakı Rusiya diplomatları Mərkəzi Elmi Kitabxananı ziyarət ediblər

Rusiyanın ölkəmizdəki fövqəladə və səlahiyyətli səfirinin müşaviri İqor Yeronin və mətbuat katibi Alina Zolotareva AMEA-nın Mərkəzi Elmi Kitabxanasını (MEK) ziyarət edib.

MEK-də görkəmli rus yazıçısı A.P.Çexovun 160 illiyi münasibətilə təşkil olunmuş sərgi ilə yaxından tanış olan səfirlik nümayəndələrinə burada nümayiş olunan kitablar haqqında ətraflı məlumat verilib. Qeyd olunub ki, sərgidə yazıçının müəllifi olduğu və haqqında yazılan, rus dilində və Azərbaycan dilinə tərcümə olunmuş 400-dən çox əsər nümayiş olunur. Bu əsərlər arasında ən qədimi, 1912-ci ildə çap olunmuş "Çexovun  məktubları" nəşri xüsusi diqqət cəlb edib.

Qonaqlar MEK heyəti ilə birlikdə Akademiklər zalında yerləşən Diplomatik fondu, Rus ədəbiyyatı, Qəzet və Nadir kitab fondlarını, oxu zallarını ziyarət edərək kitabxanada mühafizə olunan sənədlərlə tanış olublar.

Sonda İqor Yeronin Diplomatik fonda Rusiyanın Azərbaycandakı Səfirliyi tərəfindən nəşr olunan "Rusiya" jurnalının 1-ci sayını hədiyyə edib.

Qeyd edək ki, MEK 2014-cü ildən başlayaraq Rusiya Federasiyasının ölkəmizdəki səfirliyi, Moskva şəhərində Rusiya Dövlət Kitabxanası, Rusiya Elmlər Akademiyasının Təbii Elmlər Kitabxanası və Sankt- Peterburq şəhərində B.Yeltsin adına Prezident Kitabxanası, Rusiyanın "Sodeystvie" Mədəniyyət-təhsil proqramlarına yardım Fondu, Rusiya Dövlət Kitabxanası, A.Soljenitsın adına Moskva Rus Mühacirliyi Evi və Rusiya Federasiyasının regional kitabxanaları ilə əməkdaşlıq çərçivəsində müxtəlif formatlı tədbirlər, beynəlxalq kitab mübadiləsi həyata keçirib.

MEK-in Akademiklər zalında kitabxananın beynəlxalq tərəfdaşlarla  və müxtəlif ölkələrin səfirlikləri ilə qarşılıqlı əlaqələrinin nəticəsi olaraq hədiyyə olunmuş kitab və digər çap məhsullarından ibarət Diplomatik fond yaradılıb. Fondun "Rusiya Federasiyası" guşəsində Rusiya Dövlət Kitabxanası, A.Soljenitsın adına Moskva Rus Mühacirliyi Evi  tərəfindən  MEK-ə hədiyyə olunmuş 500-dən çox nəşr yer alır. MEK fondlarında isə ümumilikdə rus dilində 878.000 kitab, jurnal, dissertasiya, avtoreferat və başqa sənədlər saxlanılır.