"PREZİDENTİN JURNALİSTLƏRLƏ GÖRÜŞÜ AZƏRBAYCANDA MÜSTƏQİL MƏTBUATIN İNKİŞAFINDA YENİ MƏRHƏLƏNİN BAŞLANĞICI SAYILA BİLƏR"
Ötən həftənin sonu dövlət başçısı İlham Əliyev Azərbaycanda fəaliyyət göstərən Kütləvi İnformasiya Vasitələrinin rəhbərləri ilə görüşdü və dövlət başçısına "Jurnalistlərin dostu" mükafatı təqdim olundu. Dövlət başçısı görüşdə mətbuatla bağlı bir sıra ciddi və önəmli fikirlər səsləndirdi. Prezident İlham Əliyev görüşdə bildirdi ki, demokratik cəmiyyətin qurulması istiqamətində azad mətbuat böyük rol oynayıb. Ölkə başçısı həmçinin onu da qeyd etdi ki, media nümayəndələri sosial problemlərin həllində Azərbaycanın öncül yerlərində dayanır. Bu görüş ictimaiyyət tərəfindən yüksək qiymətləndirilərək, görüşün medianın inkişafına mühüm təsir edəcəyi bildirilir.
"Azərbaycan" qəzetinin baş redaktoru, millət vəkili Bəxtiyar Sadıqov Trendə açıqlamasında bildirib ki, Prezident İlham Əliyevin jurnalistlərlə görüşü Azərbaycanda müstəqil mətbuatın inkişafında yeni mərhələnin başlanğıcı sayıla bilər. O, Azərbaycanda dövlət başçılarının jurnalistlərin dostu seçilməsi ənənəsinin olduğunu deyib: "Vaxtilə ulu öndər Heydər Əliyev də jurnalistlərin dostu mükafatına layiq görülmüşdü və artıq ikinci dəfədir ki, cənab İlham Əliyev bu yüksək mükafata layiq görülür. Bu isə bütövlükdə həm ulu öndər Heydər Əliyevin, həm də cənab İlham Əliyevin Azərbaycanda demokratiyanın, mətbuat və söz azadlığının inkişafına, jurnalistlərə qayğı göstərmək istəklərinin və bu yolda atdıqları addımların nəticəsidir".
Görüş barədə danışan B.Sadıqov belə deyib: "Görüş çox səmimi, mehribanlıq şəraitində keçdi. Azərbaycan Prezidenti jurnalistikanın daxili məsələləri və problemləri barədə yüksək bilgi nümayiş etdirməklə danışdı, bütün problemlərə öz münasibətini bildirdi, çıxışçıları səbrlə dinlədi və müvafiq tapşırıqlar və göstərişlər verdi. Bu görüş öz nəticəsi ilə bir daha sübut etdi ki, Azərbaycan jurnalistləri səhv etməyib. Cənab İlham Əliyev hər addımında həm mətbuatın inkişafı ilə bağlı məsələlərdə, həm jurnalistlərin sosial durumunun yaxşılaşdırılmasında, həm də jurnalistləri narahat edən problemlərin həllində operativ şəkildə onların həlli üçün öz iradəsini ortaya qoyur".
Millət vəkili Eldar İbrahimov Prezidentin jurnalistlərin əməyinə çox böyük qiymət verdiyini bildirib. O, dövlət başçısının tapşırığı ilə ölkəmizdə mətbuat sahəsində çox böyük və dünyaya nümunə olacaq addımlar atıldığını deyib: "Əgər ölkə rəhbərliyi jurnalistə diqqət və qayğı göstərirsə, bu jurnalist üçün qürur və şərəf məsələsi olmalıdır. Cənab Prezident media qurumlarının rəhbərləri ilə görüşündə də dedi ki, mən dostluqda sadiqəm. Bu o deməkdir ki, dövlət başçısı bundan sonra da mətbuata diqqət və qayğı göstərəcək, bundan sonra da mətbuatla dostluq edəcək".
Millət vəkili Ülvi Quliyev Prezidentin jurnalistlərlə keçirdiyi görüşün ölkəmizdə azad mətbuatın inkişafına göstərilən diqqət və qayğının göstəricisi olduğunu diqqətə çatdırıb. Görüşdə dəyərli mesajların verildiyini qeyd edən millət vəkili bunları söyləyib: "Dövlət başçısı Azərbaycanda mətbuatın inkişafına daima dəstək verib, kütləvi informasiya vasitələrinin formalaşdırılması istiqamətində böyük addımlar atıb. Cənab Prezidentin bu dəfəki görüşü də yaddaqalan oldu. Belə ki, bu görüşdə mətbuatın hazırkı durumu müzakirə olundu, bu sahədəki çatışmazlıqların həlli üçün yerindəcə göstərişlər verildi. Cənab Prezident medianın inkişafı istiqamətində atdığı real addımlarla dəfələrlə sübut edib ki, həqiqətən də jurnalistlərin dostudur".
Millət vəkili Jalə Əliyeva görüş barədə belə deyib: "Cənab prezident atdığı hər addımda, mətbuatla bağlı gördüyü hər işdə, imzaladığı hər bir sərəncamda həqiqətən də jurnalistin dostu olduğunu bariz şəkildə ortaya qoyur. Bu səbəbdən də ölkə başçısının jurnalistlərin dostu seçilməsi təsadüfi deyil. Dövlət başçısının mətbuata olan diqqət və qayğısı hər zaman özünü göstərməkdədir. Buna misal olaraq iki il bundan əvvəl ölkə başçısının mətbuatın banisi olan Həsən Bəy Zərdabinin 170 illik yubileyinin ölkə miqyasında və ən yüksək səviyyədə qeyd edilməsi ilə bağlı sərəncamını göstərmək olar. Bu, çox böyük bir hadisə idi. Bu sərəncam nə birinci, nə də sonuncudur. Bir neçə ay bundan qabaq mətbuat işçiləri üçün yüksək standartlara malik olan bina tikilərək onların ixtiyarına verildi və həmin gün yeni binanın təməli qoyuldu. Bunlar Azərbaycanda indiyə qədər olmayan bir hadisə idi. Mətbuatın dostu olmaq ənənəsi Ümummilli lider Heydər Əliyevin hakimiyyəti dövründən başlayıb. Ulu Öndər dəfələrlə bu mükafata layiq görülüb. Ümummilli liderin mətbuatla təmasları, yaxın görüşləri, yeri gələndə etdiyi zarafatlar və ya ciddi söhbətləri mətbuat üçün bir nümunə idi. Hazırda isə bu yolu Prezident İlham Əliyev böyük ləyaqətlə davam etdirir. Bizə də ölkə başçısını təbrik etmək qalır. Dövlət başçısının mətbuatın dostu seçilməsi ölkəmizdə demokratik dəyərlərə qiymət verildiyinə bir daha sübutdur".
Ölkə başçısının "Jurnalistlərin dostu" mükafatına layiq görülməsinin çox önəmli bir hadisə olduğunu deyən millət vəkili Gövhər Baxşəliyeva ölkə başçısının bu mükafata layiq olduğunu bildirib: "Dövlət başçısı mətbuata hərtərəfli qayğı göstərir və onun bu istiqamətdə gördüyü işlər bunu açıq şəkildə ortaya qoyur. Ölkə başçısının həyata keçirdiyi işlər arasında mətbuatın xüsusi yeri var. Belə ki, mətbuat işçilərinin şəraitinin yaxşılaşdırılması ilə bağlı ölkəmizdə mühüm işlər görülür. Buna bariz nümunə mətbuat işçilərinin evlə təmin olunmasıdır. Azərbaycan dünyada yeganə ölkədir ki, mətbuat işçiləri evlə təmin olunub. 2015-ci ildə digər jurnalistlər də evlə təmin olunacaqlar. Bu, tarixi və indiyə qədər heç bir ölkədə olmayan bir hadisədir. Azərbaycan bu istiqamətdə də ilkə imza atdı. Bundan əlavə, mətbuat işçilərinin sosial vəziyyəti də ölkə başçısının diqqət mərkəzindədir. Bu istiqamətdə də işlər davam edir. Bütün bunlar bir daha göstərir ki, ölkə başçısı bu mükafata layiqdir".
Milli Televiziya və Radio Şurasının üzvü Sona Vəliyeva ölkə başçısının "Jurnalistlərin dostu" mükafatına layiq görülməsi və onun bazar günü media nümayəndələri ilə görüşü çox gözəl hal və hadisə olduğunu bildirib. O bildirib ki, görüşün baş vermə günü rəmzi məna kəsb edir. S.Vəliyeva belə deyib: "Görüş 24 noyabr bazar gününə təsadüf etdiyindən, sanki dost dostu evində qəbul edirdi. Görüş çox məhrəmanə, səmimi keçdi. Bu, hamını sevindirir. Jurnalistlərin Prezident İlham Əliyevi dost seçməyi çox mühüm hadisədir. Mükafat ölkə başçısının ölkə mətbuatına, Kütləvi İnformasiya Vasitələrinə, ölkə mediasına verdiyi qiymətin təzahürü idi. Heç bir ölkədə dövlət rəhbəri media nümayəndələrinə ev vermir. Bundan əlavə, Kütləvi İnformasiya Vasitələrinə Dövlət Dəstəyi Fondu xətti ilə mətbuata maddi yardımların ayrılması və digər bu kimi hadisələr ölkə rəhbərinin mediaya münasibətini göstərir. Bilirsiniz ki, jurnalistlər üçün növbəti bina da tikilir. Bu, Prezidentimiz tərəfindən evi olmayan dostlarına hədiyyəsidir. İnşallah, bu gözəl addımların davamını da görəcəksiniz".
AQİL
çap et