Azərbaycan Milli Elmlər Akademiyası Nizami Gəncəvi adına Ədəbiyyat İnstitutunda görkəmli ədəbiyyatşünas və publisist, Cənubi Azərbaycan ədəbiyyatı şöbəsinin müdiri, filologiya elmləri doktoru, professor Teymur Əhmədovun 90 illik yubileyinə həsr olunmuş onlayn elmi sessiya keçirilib.
Sessiyanı giriş sözü ilə AMEA-nın birinci vitse-prezidenti, Nizami Gəncəvi adına Ədəbiyyat İnstitutunun direktoru, akademik İsa Həbibbəyli açaraq akademiya rəhbərliyinin və institut əməkdaşlarının təbriklərini yubilyara çatdırıb. Akademik İsa Həbibbəyli çıxışında bildirib ki, Teymur Əhmədov Azərbaycan ədəbiyyatşünaslıq elminin ağsaqqalıdır. O, iki cəhətinə görə rekorda imza atıb. Birincisi, 90 yaşına çatan alim kimi, ikincisi, 90 yaşında da yazıb-yaradaraq mətbuatda müntəzəm çap olunan ziyalı kimi.
Akademik əvalə edib ki, "onun yazdıqları ilkin mənbələrə söykənən ciddi mətnlərdir, özünəməxsus üslubunun əsasını akademik üslub təşkil edir. Bununla belə, qəzetdə işlədiyi üçün publisistik üslubu da özünəməxsusdur. Bir sözlə, onun sabit üslubu var, öz fərdi üslubunu təsdiq etmişdir. Teymur Əhmədov nərimanovşünaslığı xüsusi elmi istiqamətə çevirib, qırx il bu istiqamətdə tədqiqatlar aparmışdır. O, Azərbaycan nərimanovşünaslığının yaradıcısı və ən görkəmli nümayəndəsidir. Onun yaradıcılığında faktla, mənbə ilə, arxiv sənədləri ilə, dövri mətbuatla işləmək mədəniyyəti var. Bu il Nəriman Nərimanovun iki cildliyini ortaya qoydu. "Nəriman Nərimanov" monoqrafiyasını təkmilləşdirib yenidən çap etdirdi. Həm də N.Nərimanov haqqında altı dildə tanıtma kitabı nəşr etdirib. Bunlardan başqa, Mirzə İbrahimov, Mir Cəlal Paşayev haqqında da sanballı tədqiqatların müəllifidir.
Yubileyi ilə bağlı olaraq Ədəbiyyat İnstitutunun ona iki hədiyyəsi var. Birincisi, 2020-ci ildə "İlin alimi" seçilib. İkincisi, institutun direktor müavini Əlizadə Əsgərli onun haqqında "Teymur Əhmədov: ədəbiyyat və mətbuat xadimi" kitabını yazıb".
Sonra Ədəbiyyat İnstitutun direktor müavini, filologiya elmləri doktoru Əlizadə Əsgərli "Sənətkarın elmi pasportu seriyası"nda işıq üzü görən "Teymur Əhmədov: ədəbiyyat və mətbuat" kitabı haqqında iştirakçılara məlumat verərək, yubilyara təbriklərini çatdırıb.
Sessiyada filologiya elmləri doktoru, professor Şirindil Alışanlı "Professor Teymur Əhmədovun ədəbiyyatşünaslıq görüşləri", filologiya elmləri doktoru Almaz Ülvi "Füyuzat" jurnalında Professor Teymur Əhmədovun türk dili və ədəbiyyatı haqqında görüşlərinə dair", Cənubi Azərbaycan ədəbiyyatı şöbəsinin elmi işçisi Fikrət Əhmədov "Professor Teymur Əhmədovun ədəbiyyatşünaslıq görüşlərində akademik Mirzə İbrahimovun rolu", filologiya üzrə fəlsəfə doktoru, dosent Pərvanə Məmmədli "Professor Teymur Əhmədov və Cənubi Azərbaycan ədəbiyyatı", filologiya üzrə fəlsəfə doktoru, yazıçı-publisist Şəfəq Nasir "Professor Teymur Əhmədov və Azərbaycan mətbuatı" adlı məruzələrlə çıxış ediblər.
Bundan başqa, Ədəbiyyat nəzəriyyəsi şöbəsinin müdiri, professor Tahirə Məmməd, filologiya üzrə fəlsəfə doktoru, "Respublika" qəzetinin baş redaktor müavini Hümbət Musayev, "Füyuzat" jurnalının redaktoru Mübariz Yunis, sosiologiya üzrə fəlsəfə doktoru Samir Səttarov, Ədəbiyyat İnstitutunun elmi katibi, filologiya üzrə fəlsəfə doktoru Mehman Həsənli çıxışlarında yubilyarın həyat və fəaliyyətinin müxtəlif tərəflərindən söz açıblar.
Sonda yubilyar Teymur Əhmədov akademiya rəhbərliyinə və institutun kollektivinə ona belə yüksək qiymət verdikləri üçün təşəkkürlərini çatdırıb: "Taleyimin 60 ili Ədəbiyyat İnstitutu ilə bağlıdır. 60 ilin 30 ilini Nəriman Nərimanovun tədqiqatı ilə məşğul olmuşam. Mən 24 yaşımda bu məbədə gəlmək üçün yeddi il hazırlaşmışam. 1995-ci ildə Ümummilli lider Heydər Əliyev məni çağırıb "Respublika" qəzetinə baş redaktor təyin etdi. 25 ildir, o işdə çalışıram. "Füyuzat" jurnalının 100 illiyindən sonra onun davamı kimi mən jurnalı bərpa etdim".
Yubilyar 90 illik yubileyini torpaqları düşmən işğalından azad olunmuş Azərbaycanın vətəndaşı olaraq qeyd etməsi sevincinə görə Ali Baş Komandan cənab İlham Əliyevə xüsusi təşəkkürlərini ünvanlayıb.
Gülnar SƏMA
Nizami Gəncəvi adına Ədəbiyyat İnstitutunun İctimaiyyətlə əlaqələr şöbəsi
çap et