F.Köçərli adına Respublika Uşaq Kitabxanasının təşkilatçılığı, “UNEC Könüllüləri” Təşkilatı və 3 saylı Bakı “ASAN Xidmət” Mərkəzinin tərəfdaşlığı ilə 2 fevral Azərbaycan Gənclər Gününə həsr edilmiş videokonfrans keçirilib.
Kitabxanadan 525.az-a verilən məlumata əsasən, videokonfrans Nizami Gəncəvi ili çərçivəsində reallaşıb.
Videokonfransda kitabxananın direktoru, Əməkdar mədəniyyət işçisi Şəhla Qəmbərova, kitabxananın elmi işlər üzrə direktor müavini, Əməkdar mədəniyyət işçisi Zahirə Dadaşova, BDU-nun filologiya fakültəsinin professoru, fəlsəfə üzrə elmlər doktoru Mətanət Abdullayeva, Kəlbəcər rayon 19 saylı məktəbin direktor müavini, yazıçı-publisist Nofəl Şirinov, BDU-nun kitabxanaçılıq-informasiya fakültəsinin müəllimi Hacı Qasımlı, “UNEC Könüllüləri” Təşkilatının sədri, İqtisad Universitetinin tələbəsi Orxan Vəliyev və təşkilatın könüllüləri, 3 saylı Bakı “ASAN Xidmət” Mərkəzinin könüllülər üzrə məsul şəxs Ələsgər Əhmədov və mərkəzin könüllüləri iştirak ediblər.
Videokonfransı kitabxananın direktoru Şəhla Qəmbərova açaraq qonaqları salamlayıb onları təqdim etdi. Ş.Qəmbərova Beynəlxalq Gənclər Günü haqqında ətraflı tarixi məlumatlar verib. O, çıxışında ölkəmizdə gənclər siyasətinin əsasının ulu öndər Heydər Əliyev tərəfindən qoyulduğunu qeyd edib. Bildirdi ki, Ümummilli lider Heydər Əliyevin uzaqgörənliklə formalaşdırdığı gənclər siyasəti bu gün Prezident İlham Əliyev tərəfindən layiqincə davam etdirilir. Dövlət başçısı İlham Əliyevin 2007-ci ilin “Gənclər ili” elan edilməsi ilə bağlı Sərəncamı gənclərin ölkə həyatındakı fəallığını xeyli artırıb. Gənc nəslin düzgün yetişdirilməsi ölkə siyasətində daima önəmli yer tutur. Bu gün Azərbaycanda sağlam, vətənpərvər, intellektli gənclik formalaşdığını xüsusi ilə diqqətə çatdırıb.
Qonaqlar, dahi Azərbaycan şairi və mütəfəkkiri Nizami Gəncəvi və 2 fevral Gənclər Günü ilə bağlı çıxışlarında, ədibin yaradıcılığında əməksevərlilik, gəncliyimiz gələcəyimizdir və. s mövzulara toxunublar.
Konfrans çərçivəsində, 3 saylı Bakı “ASAN Xidmət” Mərkəzinin könüllülərinin iştirakı ilə hazırlanmış Nizami Gəncəvi və Gənclər Gününə həsr olunmuş video-materiallar nümayiş edilib. Eləcə də, N.Gəncəvi yaradıcılığından ən sevilən qəzəllər və qəzəllərə bəstələnmiş mahnılar ifa olunub.
çap et