525.Az
Beynəlxalq Qadınlar Günü silsilə tədbirlərlə qeyd olunub
İ.Əbilov adına Mədəniyyət Mərkəzində Beynəlxalq Qadınlar Gününə həsr edilmiş tədbir keçirilib. Mərkəzin direktoru Mirəhməd Əsgərov tədbir iştirakçılarını əlamətdar bayram münasibətilə təbrik edib.
Tədbirin nəğməli qonağı –Azərbaycan Dövlət Akademik Opera və Balet Teatrının solisti, Əməkdar artist Gülüstan Əliyevaya verilib.
G.Əliyeva tamaşaçıları Xalq artisti Şəfiqə Axundovanın Xalq şairi Mirvarid Dilbazinin sözlərinə bəstələdiyi “Anam yadıma düşdü” mahnısı ilə salamlayıb.
Tədbirdə tanımış şair Vahid Əziz analara həsr etdiyi şeirini söyləyib, Xalq artisti Zamiq Əliyev, Əməkdar artistlər Səbuhi İbayev və Zakir Əliyev zərif cinsin nümayəndələrinin şəninə yazılmış mahnılar ifa ediblər. Mədəniyyət Mərkəzinin “Vurğun” poeziya teatrının, “Könül” rəqs ansamblının üzvləri maraqlı kompozisiya göstəriblər.
İsmayıllıdakı Gənclər Mərkəzində də 8 Mart – Beynəlxalq Qadınlar Gününə həsr olunmuş tədbir olub. Uşaq incəsənət məktəbi şagirdlərinin həsr olunmuş yaradıcılıq gecəsi keçirilib.
Mərasimdə çıxış edənlər Beynəlxalq Qadınlar Günü münasibətilə qadınları təbrik etmiş uşaq incəsənət məktəbi barədə qısa məlumat vermiş, şagirdlərə uğurlar arzulayıblar.
Yaradıcılıq gecəsi balacaların ifasında “Cücələrim” qrupunun çıxışı ilə başlanıb. Sonra bir-birinin ardınca gözəl ifalar dinlənilib.
Şagirdlərdən ibarət ansamblın, V sinif şagirdi Samirə Məmmədovanın, Günel və Xuraman Osmanova bacılarının, “Pöhrə” televiziya müsabiqəsinin laureatı Sirus Xasməmmədovun və başqalarının ifaları, rəqslər, “Leyli və Məcnun” operasından səhnələr və digər musiqi nömrələri tamaşaçılar tərəfindən sürəkli alqışlarla qarşılanıb.
8 Mart – Beynəlxalq Qadınlar Gününə həsr olunmuş daha bir tədbir Martın 9-da Kiçik Karvansarada Azərbaycanda fəaliyyət göstərən diplomatik missiya rəhbərlərinin xanımlarının təşkilatı (“HOMS”) tərəfindən keçiriləcək.
“İçərişəhər” Dövlət Tarix-Memarlıq Qoruğu İdarəsinin dəstəyi ilə reallaşacaq tədbirdə 20-dən artıq dövlətin nümayəndəsi iştirak edəcək. İdarədən “525”ə verilən məlumata görə, tədbirdə hər ölkənin milli sənətkarlıq və mətbəx nümunələrinin, suvenirlərinin satış-sərgisi təşkil olunacaqdır. Həmçinin milli musiqi və rəqslərin nümayişi də nəzərdə tutulur.
Xeyriyyə aksiyasında, eyni zamanda, qiymətli mükafatları udmaq imkanı yaradacaq lotereya tirajı da keçiriləcəkdir.
Tədbirdən əldə edilən mənfəət “HOMS”un Azərbaycanda dəstəklədiyi və əməkdaşlıq etdiyi bir sıra yerli xeyriyyə fondları və layihələrinin fəaliyyətinə yardım məqsədilə istifadə olunacaqdır.
Beynəlxalq Muğam Mərkəzində 8 Mart – Beynəlxalq Qadınlar Gününə həsr edilmiş konsert olacaq. Konsert Azərbaycan Televiziya və Radiosunun musiqi kollektivləri ilə Beynəlxalq Muğam Mərkəzinin birgə həyata keçirdikləri layihə çərçivəsində təşkil ediləcəkdir.
Konsert proqramında Cahangir Cahangirov adına xor kollektivi və Tofiq Əhmədov adına estrada-simfonik orkestrinin nəzdində fəaliyyət göstərən “Cazz Bənd” qrupu çıxış edəcəkdir.
Konsertin solistləri Xalq artisti, tarzən Ramiz Quliyev, vokalçı Ramil Qasımov, xanəndələr Ehtiram Hüseynov, Bəyimxanım Vəliyeva, Səbinə Ərəbli, Ariz Hüseynov, İlahə Əfəndiyeva, Mirələm Mirələmov, Zabitə Alıyeva, Sərxan Bünyadzadə, Günay İmamverdiyeva və Kamilə Nəbiyevadır.
S.ABDULLAYEVA
08.03.2014 çap et