Azərbaycan tarix elminin görkəmli nümayəndələrindən biri, Bakı Dövlət Universitetinin professoru Fəzail İbrahimli siyasi həyatına bizimlə bir sırada, Vətəndaş Həmrəyliyi Partiyasında başlamış, partiynın quruculuğu və inkişafında əvəzsiz xidmət göstərmişdir.
Otuz ilə yaxındır yanaşı yol gəlirik. Bir insan, alim, müəllim, millət vəkili, siyasətçi kimi onun haqqında çox danışmaq və yazmaq olar. Bu sahələrin hər birində onun xarakterinin, şəxsiyyətinin bir gözəl tərəfi üzə çıxır. Lakin bir ümumi cəhət də var bu da Fəzail İbrahimlinin halal adam olması, dürüstlük və mərdliyidir.
O, siyasətə də Universitetdə qazandığı ədalətli və prinsipial müəllim adı və şöhrəti ilə gəlmişdi. Bu keyfiyyətlər ona həm VHP - də, həm də Milli Məclisdə özəl bir sayqı və nüfuz qazandırmışdır.. 70 yaş ömrün müdrik çağırır. Ancaq mən Fəzail bəyi elə cavanlığından milli əxlaqa bağlı, böyük-kiçik yeri bilən, öz ləyaqətini qoruyan, haqqın tərəfində dayanan, sözünü cəsarətlə deyən, müdrik bir insan kimi tanımışam. VHP- nin milli birlik ideyası Fəzail bəyin də vətəndaşlıq və siyasətçi amalını təşkil edir. Əxiz dostumuz 70 yaşını ölkənin qanunvericilik hakimiyyətinin zirvəsində, Milli Məclisin sədrinin müavini və Komitə sədri məqamında qarşılayır.
Bu, zəhmətlə yoğrulmuş, namuslu bir ömrün halal nəticəsidir! Dəyərli məsləkdaşımı ömrün yetmişinci baharı münasibətiylə ürəkdən təbrik edir, ona uzun ömür və can sağlığı arzulayıram. Bu yaşdan sonra dəyişilmək ehtimalı yoxdur. Yola davam!
çap et