Ali Baş Komandan İlham Əliyevin rəhbərliyi ilə rəşadətli Azərbaycan Ordusunun keçirdiyi hərbi əməliyyatlar böyük zəfərlə sonuclandı və nəticədə təxminən 30 il düşmən işğalında olan torpaqlarımız azad edildi.
44 günlük Vətən müharibəsi nəticəsində düşmənin canlı qüvvəsi, müzəffər ordumuzun qarşısında sözün həqiqi mənasında, diz çökdülər. Azərbaycan Ordusunun sarsıdıcı zərbələrindən vahiməyə düşən düşmən qüvvələri canlarını qurtarmaq hayında qalıb xeyli miqdarda silah-sursatı, hərbi texnikanı döyüş meydanında qoyub qaçdılar. Bunun da nəticəsində cəsur hərbçilərimiz bu döyüşlərdə xeyli sayda hərbi qənimətlər əldə etdilər.
Xatırlayırsınızsa, Azərbaycanın Vətən müharibəsində Qələbəsinin rəsmiləşməsindən bir gün sonra - noyabrın 11-də müzəffər Ali Baş Komandan hərbçilərlə görüşündə düşmənin qənimət götürülmüş və məhv edilmiş texnikasının nümayişi üçün müəyyən planların olduğunu bildirmişdi. Bir müddət sonra - dekabrın 10-da Zəfər paradında həmin texnikaların bir qismi nümayiş etdirildi.
Bunun ardınca Prezident İlham Əliyev Hərbi Qənimətlər Parkının salınması haqqında təşəbbüs irəli sürdü. Çox qısa zamanda görülən genişmiqyaslı işlər artıq yekunlaşıb: açıq səma altında nadir park salınıb. Zəfər paradının ən yaddaqalan və rəmzi kompozisiyalardan biri Azərbaycan Silahlı Qüvvələrinin işğaldan azad olunan torpaqlarda düşməndən qənimət götürdüyü 2000-dən çox avtomobilin nömrə nişanından hazırlanan "Qarabağ Azərbaycandır!" yazılı lövhə də parkın ərazisindədir. Parkda sərgilənən ən maraqlı eksponatlardan biri də, erməni əsgərlərinin maketləridir. Layihə üzərində çalışan peşəkar heykəltəraşların hazırladıqları maketlərdə mənfur düşmən bütün eybəcərlikləri ilə əks etdirilib.
Həmin maketləri hazırlayan heykəltəraşlardan biri, Rəssamlıq Akademiyasının Heykəltəraşlıq fakültəsinin məzunu Müşfiq Heydərovla bu mövzuda qısa söhbət etdik.
***
- Necə oldu ki, maketləri hazırlamaq təklifi aldınız?
- Maket və mulyajların hazırlanması üçün tender elan olunmuşdu. Erməni əsgərlərinin mulyajlarının hazırlanması üçün tenderdə iştirak etdikdən sonra işlər üç nəfər heykəltəraş arasında bölüşdürüldü: 16 ədəd mulyajı Kamran Əsədovla mən birlikdə hazırlamışıq, qalanları isə Rəşid Məhərrəmovun komandası tərəfindən ərsəyə gətirilib.
- Mulyajların bir hissəsinin sizə həvalə olunduğunu biləndə hansı hisslər keçirdiniz?
- Şübhəsiz, bu, mənim üçün böyük məsuliyyət idi. Təklifi eşidəndə, təbii ki, belə bir layihədə iştirak etdiyim üçün qürur hissi keçirdim.
- Ağlınızda olan ideyaları mulyajların üzərində tam olaraq əks etdirə bildiniz, yoxsa ideyalar hazır verilmişdi?
- Biz mulyajların simasında əsasən 44 günlük Vətən müharibəsində igidlərimiz qarşısında tab gətirə bilməyib səngərdə gizlənən, qorxaq, döyüş meydanından qaçan, diz çökən erməni əsgərlərinin obrazlarını əks etdirməyə çalışmışıq.
- Maketləri hazırlayarkən başqa həmkarlarınızla da məsləhətləşdiniz?
- Bu layihə üzərində həmkarım Kamran Əsədovla birlikdə çalışmışıq. Ona görə də, işin ərsəyə gəlməsində ikimiz məsləhətləşmişik.
- Bəs xaricdə olan hərbi müzeylərdən ilhamlandığınız məqamlar varmı?
- Bunlar mulyajdır, ona görə də ancaq obraz yaratmağa çalışmışıq. Əlbəttə, xarici ölkələrdə olan hərbi muzeylər haqqında da araşdırma aparıb maraqlanmışıq. Oradakı muzeylərdə də belə mulyajlar sərgilənir. Çalışdıq ki, onlardan daha yaxşı iş çıxaraq. Məqsədimiz ermənilərin öz aləmində yaratdığı "məğlubedilməz erməni ordusu"nun əslində, bir mif olduğunu hər kəsə göstərmək idi.
- Mulyajlarla bağlı müsbət fikirlərlə yanaşı, mənfi rəylər də səsləndirilir. Bu haqda nə düşünürsünüz?
- Sözün düzü, biz işlədiyimiz müddətdə heç bir mənfi reaksiya ilə qarşılaşmadıq. Hətta sosial şəbəkədə paylaşdıqdan sonra belə, mənfi rəylə rastlaşmadım. Ola bilər, saytlarda belə rəylər var, ancaq düzünü desəm, oxumağa vaxtımız olmayıb. Ətrafımızda olan, bizi tanıyan insanlar da müsbət rəy bildirdilər. Bununla belə, mənfi rəylərin gəlməsi normaldır, çünki hər bir insanın baxış bucağı eyni deyil. Buna görə də biz hər kəsin fikrinə hörmətlə yanaşırıq.
Aytac ASLAN
çap et