SOCAR istiqrazları üzrə növbəti faiz ödənişinə hazırlaşır

Azərbaycan Dövlət Neft Şirkətinin (SOCAR) törəməsi "SOCAR Capital" MMC təmsil etdiyi şirkətin istiqrazları üzrə növbəti faiz ödənişinə hazırlaşır.

"Report" bu barədə "SOCAR Capital"a istinadən xəbər verir.

Məlumata görə, ödəniş aprelin 19-da həyata keçiriləcək. Nominal dəyəri 1 000 ABŞ dolları, tədavül müddəti 5 il, illik gəlirliliyi 5  faiz olan SOCAR istiqrazlarının sahiblərinə 1,25 milyon dollar rüblük faiz ödəniləcək.

4 ildən artıqdır ki, yerli fond bazarında ən çox müraciət olunan qiymətli kağıza çevrilmiş SOCAR istiqrazları 2021-ci ilin ikinci, ümumilikdə isə 18-ci faiz ödənişi nəticəsində sahiblərinə növbəti dəfə gəlir gətirəcək. Bununla da istiqraz sahiblərinin ümumi gəliri 22,5 milyon dollara yüksələcək. Yekun gəlir isə 25 milyon dollar olmalıdır.

İstiqrazların təkrar bazar əməliyyatlarının dəyərinin 200 milyon dollara çatması, bağlanmış əqd sayının 2400-ü ötməsi və "Bakı Fond Birjası" QSC-də ən çox tədavül olunan korporativ maliyyə alətinə çevrilməsi bu növ qiymətli kağızlara olan yüksək tələbatın göstəricilərindəndir.

1 və 5 saylı "ASAN xidmət" mərkəzlərindən də əldə edilməsi mümkün olan SOCAR istiqrazlarının 2021-ci ilin ilk rübündə ölkənin korporativ istiqraz bazarındakı payı 62 faiz təşkil edib.

SOCAR istiqrazlarının növbəti kupon ödənişi bu il iyulun 17-də baş tutacaq.