Ehtiyatda olan mayor Hüseyn Akif oğlu Həsənov sentyabrın 27-də başlayan Vətən müharibəsində döyüş meydanında qəhrəmanlıq salnaməsi yazan igid hərbçilərimizdəndir.
Vətənpərvər, yurduna, torpağına bağlı bu dəyərli insan 1976-cı ildə Lerik rayonun Siyov kəndində dünyaya göz açıb. Kənd məktəbinin yeddinci sinfini başa vurub C.Naxçıvanski adına hərbi məktəbinə daxil olur. Daha sonra təhsilini Bakı Ali Birləşmiş Komandirlər Məktəbində davam etdirən Hüseyn Həsənov 1995-ci ildə leytenant rütbəsində Tovuz rayonuna təyinat alır. İlk gündən canından artıq sevdiyi Vətənə şərəflə xidmət edir, bacarıqlı komandir, gözəl insan, vətənpərvər bir şəxs olaraq tanınır. Təlimlərdə döyüş hazırlığı ilə fərqlənir. 8 il Heydər Əliyev adına Ali Hərbi Məktəbdə çalışır. 2010-cu ildə xidmət üçün Şəmkir rayonuna göndərilir. Fəaliyyət göstərdiyi müddətdə Azərbaycan naminə qəlbinin odunu, hərarətini əsirgəmir. Cəsur komandir cəbhə xəttində birneçə dəfə yağı düşmənlə qarşı-qarşıya dayanır. Əsgərlərinə qarşı səmimi, mehriban olmaqla, onlara Vətəni necə sevməyi, torpağı necə qorumağı öyrədir. Vətənə nümunəvi xidmətə etdiyinə görə birinci, ikinci, üçüncü "Qüsursuz xidmətə görə", "Azərbaycan Silahlı Qüvvələrinin 90 illiyi", "Azərbaycan Silahlı Qüvvələrinin 95 iliyi", eləcə də "Azərbaycan Qüvvələrinin 100 illiyi" yubiley medallarına layiq görülür, mayor rütbəsi ilə ehtiyata buraxılır.
2020-ci il sentyabrın 27-də Azərbaycan Ordusu əks-hücum əməliyyatları başlayan kimi Hüseyn Həsənov döyüş təcrübəsinə malik bir zabit kimi Vətənin harayına yollanır və zəfər günümüzə qədər ermənilərə qan uddurur, Füzulinin, Cəbrayılın, Zəngilanın, Qubadlının, Ağdamın, Murovdağın azad olmasında əsl cəngavər kimi vuruşur, düşmənin canlı qüvvəsini, neçə-neçə texnikasını məhv edir və qənimət kimi götürür. Bunlarla bərabər, Qarabağın, eləcə də ətraf rayonların hava sərhədlərin müdafiəsində rəşadət göstərir. Hər dəfə Vətənin azad edilmiş torpaqlarında Müstəqil Azərbaycanın qələbə bayrağı dalğalananda ürəyi dağa dönür. Torpaqlarımız işğaldan azad olunandan sonra qazi kimi geri qayıdır...
Şair-publisist Rövşən İmanov qəhrəman zabitimiz Hüseyn Həsənov haqqında ürək dolusu danışır: "Mən Hüseyni doğulduğu gündən tanıyıram. Vətənə, torpağa məhəbbət lap uşaq vaxtlarında hopmuşdu onun canına. Biz indi öz qəhrəman oğlumuzla fəxr edirik. Gözəl vətəndaş, layiqli vətənpərvər kimi, gələn nəsillərə də örnək olacaq".
Mayor Hüseyn Həsənov həm də əsl azərbaycanlı adət-ənənələri üzərində qərar tutan, pak niyyət və arzulara tapınan gözəl ailə sahibidir. Həyat yoldaşı Nazilə xanım Binə qəsəbəsindəki 29 saylı poliklinikada tibb bacısıdır. Qızı Günay bank işçisidir. Oğlu Xəyal kollec tələbəsidir. Onların sevdalandığı ali məqsəd ulu duyğularla yaşayıb, bacardıqca öz xalqına xeyir verməkdir.
Zəfər ORUCOĞLU
çap et