İyulun 28-də Bakı Kitab Mərkəzində yazıçı Şah Selimi Türkayın "Ev dustağıyam" əsərinin təqdimatı və imza günü keçirilib.
AZƏRTAC xəbər verir ki, əsərin ana xəttini insan əqidəsinin, ruhunun, fikir və düşüncəsinin azadlığı, mənəvi müstəqilliyi təşkil edir. Əsərin qəhrəmanlarının dilindən sonsuz sevgi, övlad və yurd həsrəti, humanistlik və insan dünyasının mənəvi toxluğu, türk dünyasının keçdiyi tarixi yol ön planda bədii ifadələrlə və obrazlı sözlərlə təsvir edilib.
Tədbiri giriş sözü ilə açan Bakı Kitab Mərkəzinin direktoru Günel Anarqızı bildirib ki, "Ev dustağıyam" romanı müəllifin Azərbaycan dilində yazdığı ilk əsərdir. Müəllifin uzun illər Londonda yaşadığını deyən G.Anarqızı bildirib ki, yazıçı gənclər üçün bir örnəkdir, çünki o, ölkəmizi xaricdə layiqincə təmsil edir. O, kitabını azadlığı sevən insanlara həsr edən Şah Selimi Türkaya uğurlar arzulayıb və əsərin oxucuların marağına səbəb olacağını söyləyib.
Əsərin olduqca maraqlı və peşəkar səviyyədə yazıldığını bildirən Azərbaycan Yazıçılar Birliyinin sədr müavini Rəşad Məcid deyib ki, kitabı oxuduqdan sonra onda suallar yaranıb və o, bu suallara romanın son fəslində cavab tapıb. Əsərin əvvəlcə ingilis dilində yazıldığını, sonradan müəllif tərəfindən tərcümə olunduğunu deyən Rəşad Məcid bildirib ki, mətn Azərbaycan dilində olduqca qeyri-adi və orijinal səslənir: "Hamı bilir ki, böyük romanlar insanları qorxudur, ancaq bu kitab məni cazibəsinə aldı və əsəri axıra qədər oxudum", - deyə Rəşad Məcid vurğulayıb.
"ASAN Radio"nun rəhbəri Emin Musəvi əsərə Azərbaycanın tanınmış yazıçıları tərəfindən müsbət rəy verildiyini söyləyib. Qeyd edib ki, bu, Şah Selimi Türkay üçün böyük uğurdur. O, bunun yazıçı üçün bir motivasiya olacağını deyib.
Ədəbiyyatı mənəviyyatın ən uca zirvəsi hesab edən Əməkdar memar, Azərbaycan Memarlar İttifaqının sədri professor Elbay Qasımzadə bildirib ki, bu kitabda Şah Selimi Türkay ürəyindən keçən fikirlərini yazıb, ailəsinə olan münasibətini bildirib. O, müəllifin bundan sonra da uca zirvələri fəth edəcəyinə əminliyini ifadə edib.
İştirakçılara təşəkkür edən Şah Selimi Türkay əsərlə bağlı fikirlərini bölüşüb: "Romanın ümumi məğzi azadlıqda olarkən öz daxili dustaqlıq həyatını yaşayan insanlar barəsindədir. Mən nümunəvi, həqiqi müəllim obrazı yaratmaq istəmişəm. Ümid edirəm yaratdığım həqiqi müəllim obrazı bir çox gənclərimizə nümunə olacaq".
Qeyd edək ki, Şah Selimi Türkay Azərbaycan Dövlət İqtisad Universitetinin Beynəlxalq iqtisadi münasibətlər fakültəsinin məzunu olduqdan sonra təhsilini Londonda davam etdirib. 2015-2018-ci illərdə Azərbaycanın müxtəlif dövlət qurumlarında strateji tədqiqatçı, iqtisadi analitik, layihə və investisiyalar üzrə mütəxəssis kimi fəaliyyət göstərib. Ədəbi yaradıcılığa xüsusi marağı olan Şah Selimi Türkayın 2019-cu ildə qələmə aldığı qısa hekayəsi Londonun tanınmış Faber Akademiyası tərəfindən yüksək qiymətləndirilib.
Milli Qəhrəman Polad Həşimovun xatirəsinə ithaf edilmiş kitabın təqdimatı keçirilib
İyulun 28-də "Azərkitab" Kitab Təbliğatı Mərkəzində Azərbaycanın Milli Qəhrəmanı, general-mayor Polad Həşimovun xatirəsinə ithaf edilmiş "Polad necə bərkidi" kitabının təqdimat mərasimi keçirilib.
Təqdimat mərasimində Polad Həşimovun anası Səmayə xanım, Qafqaz Müsəlmanları İdarəsinin (QMİ) səlahiyyətli nümayəndəsi hacı Şahin Həsənli, fəlsəfə doktoru, pedaqoq Mail Yaqub, KİV rəhbərləri və ziyalılar iştirak ediblər.
Tədbir zamanı ilk olaraq Azərbaycanın suverenliyi, ərazi bütövlüyü, torpaqlarımızın toxunulmazlığı uğrunda həlak olan şəhidlərin xatirəsi ehtiramla yad olunub.
Tədbirdə çıxış edən kitabın müəllifi, yazar İlqar Kamil kitab haqqında iştirakçılara ətraflı məlumat verib. O qeyd edib ki, kitabda Polad Həşimovun həyat yoluna çox böyük önəm verilir: "Bu kitab şəhid generalımız Polad Həşimov haqqında yazılıb. Belə kitablar çox yazılmalıdır. Ümumiyyətlə, Polad Həşimov kimi şəxsiyyətlər haqqında bu cür məlumatların toplanması təqdirəlayiqdir. Biz bunu gələcək nəsillərə ötürməliyik".
Daha sonra hər kəsə təşəkkürünü bildirən Səmaya xanım deyib: "Polad sözündən dönməyən, mərhəmətli, iradəli, hərdən öz dünyasına qapılan bir uşaq idi. Foto çəkməyi sevərdi. Kənd uşaqlarının səkillərini çəkərdi. Çox cəsarətli idi, hər şeyi öyrənməyə çalışırdı. İdmanla məşğul olaraq, özü də bilmədən özünü bu həyata hazırlayırdı. Hərbi hissədə əsgərləri onu mənim komandirim deyə çağırardı. Kitaba gəlincə, bu işdə kimin zəhməti varsa, hər kəsə öz dərin minnətdarlığımı bildirirəm. Mən fəxr edirəm ki, sizin kimi qədirbilən gənclərimiz var".
Sonra kitab müəllifin imzası ilə tədbir iştirakçılarına təqdim edilib.
çap et