Müasir aqrar istehsal fəaliyyəti bu sahənin mütəxəssislərinin ixtisas bacarıqlaının daim yenilənməsini, onların sürətlə dəyişən texnoloji mühitin xüsusiyyətləri ilə ayaqlaşmaq qabiliyyətlərinin çevikliyini tələb edir. Bu məqsədlə həyata keçirilən "Aqrar sahədə çalışan mütəxəssislərin bilik və bacarıqlarının artırılması" layihəsi çərçivəsində Gəncədə yerləşən Azərbaycan Dövlət Aqrar Universitetində kənd təsərrüfatı istehsalının dolğun kadr təminatının başlıca istiqamətləri olan aqronomluq, baytarlıq və aqromühəndislik sahələri üzrə ödənişsiz təkmilləşdirmə kurslarının fəaliyyətinə start verilib.
Kursların açılışı zamanı universitetin rektoru, AMEA-nın müxbir üzvü, professor İbrahim Cəfərov bildirib ki, layihə aqrar mütəxəssislərin praktik bilik və bacarıqlarının artırılması işinə töhfə olmaqla, yerlərdə kənd təsərrüfatı istehsalı templərinin yüksəlməsinə xidmət edəcək.
Layihədə Azərbaycan Qida Təhlükəsizliyi Agentliyinin, Dövlət Aqrar İnkişaf Mərkəzlərinin, "Azərşəkər" və "Baytarlıq" MMC-lərin, bir sıra digər təşkilat və müəssisələrin əməkdaşları, həmçinin, aqrar universitet məzunları ilə yanaşı, sahibkarlıq fəaliyyəti ilə məşğul olan fermerlər də iştirak edirlər.
Çıxış edən mütəxəssislər bu cür kursların vacibliyini vurğulayaraq, universitetin maşın-traktor parkının, müasir tədris mərkəzlərinin, heyvandarlıq komplekslərinin, Baytarlıq klinikasının, heyvan kəsimi sexinin, Quşçuluq tədris mərkəzinin, Süni mayalanma tədris mərkəzinin, qeyd olunan sahələr üzrə təkmilləşdirmə kurslarının təşkilinə geniş imkanlar yaratdığını diqqətə çatdırıblar.
Layihə iştirakçıları universitetin tələbə evində ödənişsiz yaşayış yeri ilə də təmin olunublar.
Zakir Muradov,
Gəncə
çap et