AĞLA MƏNİ...
Dolub, yağmaq istəyir
Gücü çatmır özünə...
Asta-asta sisləyir
Bulud, dönüm gözünə -
Ağla məni, içində
Qəfəs divarlarının
Cırmaqlanıb bir üzü...
Oxşanıb əllərinlə
Nəfəs dəyən pir üzü -
Tağla məni içində...
Həsrətin rəsmini çək
Anların göstər lək, lək...
Tək Allah bilən sirr tək
Ay göydən gələn mələk -
Saxla məni, içində...
DİVARDAN KÖÇÜRDÜYÜM ŞEİR
Odumu kül edibsən,
Sinəmi sönmüş kürə...
Təəssüflə gedibsən -
Vaxtsız itkiyə görə...
Kirpiyində düyünlər
Baxışında nəm kədər...
Kirpiyində üyünər -
Keçər bir gün qəm, kədər...
Xatirə şəkillərin
Solan çöhrəsi kimi...
Quruyar əklilərin -
Vida pöhrəsi kimi...
Əllərin yaddaşı da
Silinər bir yad əldə...
Qalar bir baş daşında -
Bir də ki, bu ad - eldə...
...Unutduğun nə vaxtsa
Şirin yuxuna gələr...
Ümid adlı bir ruh da -
Səni özünə bələr...
BƏNZƏTMƏ
Bir yarpaq qopub düşdü
Dodaqdan söz qopan tək...
Ruhum susdu, bürüşdü -
Su kösövə hopan tək...
Səs açdı qapısını
Ürəyimin səbirlə...
Bir varlıq var ortada -
Nə məndədi, nə birdə...
Can ovuc içindəsə
Asılıbsa bir teldən...
Düşəcək ayağına -
Yarpaq kimi, bir yeldən!..
YAMAN DARIXIRAM
Nə vaxtdı durmusan gözümdən iraq,
Başım dumanlıdı, fikrim dağınıq...
Arada at çapır - dincəlmir sazaq -
Qəlblə bir nöqtəyə susub baxırıq,
Yaman darıxıram sənsiz, əzizim!
Yuxum tikan üstə, ruhum divanə,
Solumda, sağımda fərqli bir həyat.
Bütün sözlərimin baxıb cəminə,
Sən cavab əvəzi bir kəlmə "hə" at -
Yaman darıxıram sənsiz, əzizim!
Hər şey də, hər kəs də könlümə dəyir,
Bezirəm, küsürəm özüm -özümdən...
Üstümə qaranlıq kölgəsin əyir -
Gözünü sən göndər asım gözümdən,
Yaman darıxıram sənsiz, əzizim!
Dünyanı dolaşmaq - xəyalda bir an
Dörd tərəf ovcumun içindən baxır...
Bizim aramızda susaraq duran -
Mənim yanağıma içimdən axır...
Yaman darıxıram, sənsiz, əzizim...
İsmarıc, ya bir zəng, ya elə qəfil
Adından üstümə düşən bir gilə...
Məni səfil edib, bu həsrət səfil -
Bunu demirəm ki, mən elə, belə
Yaman darıxıram, sənsiz, əzizim!
Tanrı qucaq açmır, yer də ki, yaxa
Yoruldum ahları körpü etməkdən...
Dörd divar içində, göz baxa-baxa -
Tək qeybət edirəm gəlib- getməkdən...
Yaman darıxıram, Sənsiz, əzizim!..
...Səsin bir şam kimi yandı içimdə,
Büzüşmüş varlığım dirildi sanki...
Qayıtdı özümə itən gücüm də -
Bir də təzələndi ruhum inan ki -
Yaman darıxıram sənsiz, əzizim!
BİR AZ
Gün özü də adi bir şam
Onda nur var, onda yaşam!
Fərqi bəlli səhər, axşam -
Bir az, bir az...
Ötən anın ruhu qəmsə
Yanaq islaq, kirpik nəmsə...
Payla, səndə ümid cəmsə -
Bir az, bir az...
Gəzə-gəzə gözüm gözü
Söykəyirəm közə - közə!
Onda mənəm, məndə özü -
Bir az, bir az...
Mən də hər gün yığışıram...
Vaxta görə sıxışıram!
Bu dünyaya sığışıram -
Bir az... bir az!..
...Səsin bir şam kimi yandı içimdə,
Büzüşmüş varlığım dirildi sanki...
Qayıtdı özümə itən gücüm də -
Bir də təzələndi ruhum inan ki -
Yaman darıxıram sənsiz, əzizim!
İNDİ
Yenə toparlana bilmirəm, gülüm
Lap yağa bilməyən buludam indi...
Yumulsun gözlərim, qurusun dilim -
Bəlkə... onda Səni unudam indi...
Min sual tuşlanır - səssiz, üzümə
Sənə səsim çatmır, gücüm özümə...
Kaş bir an, gözünü tutub gözümə -
Gözümün səmasın duruldam indi...
Dünənim əl çatmaz, yozumsuz yuxu
Gördüm öz günümdə yaşıdım Nuhu...
Cismimi tərk etmiş, nəm çəkən ruhu -
Sərib kirpiyimə qurudum, indi...
MƏLƏKSƏN
Sən, ətəyi namaz üçün,
Baxışları işıq olan...
Varlığında Tanrı gücün,
Daşıyan bir aşiq olan -
Mələksən!..
Sən, yuxunu gerçək edən
Nağıla da ümid bükən...
Qaranlığı yarıb gedən,
Aydınlığa libas tikən -
Mələksən!..
Sən canımda can sahibi,
Ruhumda da gerçək sakin!
Mən bilirəm, yer üzündə,
Sən bəndəsən ...amma ...lakin -
MƏLƏKSƏN!
DUA EDİRƏM
Ürəyin ümid yerimdi,
Adına dua edirəm...
Həftədə ən çox - sirrimdi -
Adına dua edirəm!
Bəllidi yazılı qədər,
İçimdə yurd salıb kədər...
Sənin doğmaların qədər -
Yadına, dua edirəm...
Gec də olsa tapıb çəmin
Könlün ovutmuşam qəmin...
Allah, sənə, bir də həmin -
Qadına dua edirəm!
KİMLİYİN TƏQDİMATI
Anbaan əzab verib,
Baxaraq qürrələnmək...
Bu nə asılmaq deyil,
Nə də ki güllələnmək! -
Bu nifrətdi...
Ruhuna bələnən tor
Deyir, içində sus, yan!
Gözlərdən tökülən qor -
Yuxuya olan üsyan! -
Bu xiffətdi...
Düşünəndə, lap asda
Yaddaşında səs edən...
Şəkillərlə təmasda
Yanağını isidən -
Bu ülfətdi...
Nəfəs aldığı anda
Yoxluğuna darılan...
Haqqa üz tutub, canda
Son ümidə sarılan -
Bu Əbülfətdi!
ÇATMIŞAM
Yorulmuş atların güllələndiyi,
Məqama çatmışam, günə çatmışam...
Bir ömrün kül olub - kül ələndiyi -
Döngəyə çatmışam, tinə çatmışam...
Toplayıb üst-üstə ahı bir yerə,
Gümanı bir yerə, gahı bir yerə...
Yığıb piyadanı - şahı bir yerə -
Çıxmışam yaylağa binə, çatmışam!
Yaşayıb bu istək, bu adətlə mən,
Məhəbbət! - sonsuz bu səadətlə mən...
Məcnunun etdiyi ibadətlə mən -
Onun sığındığı dinə çatmışam!
İşığa çevirib ürək səsini
O səsin zərrələr məsaməsini...
Ölçəndə həsrətin məsafəsini -
Görürəm lap çoxdan Çinə çatmışam!
ALLAHA DEDİKLƏRİMDƏN
Allah, içimdə ərk var
Qoluna girim, gedək...
Yolumun uzunluğun -
Sən bilən qədər edək...
Bu, bəndə şıltaqlığı...
Sənə sevgidi məndə...
Mən öz sevgimdə qalım -
Allahlığında sən də!
Dəyişən gün, ötən an
Ömür qoparır məndən...
Həsrətin uzunluğu -
Küsdürür, məni səndən!
Növbə uzun, səbir dar
Dərd də ki başdan aşır...
Ürəyimə damanlar -
Tay bəbəyimdən daşır...
Allah, vaxtını aldım
Bəndə ərkimə görə...
Sonda, ay qadan alım,
Məni tapşır, bu Yerə !
ƏLİMİ AÇIB DEDİKLƏRİMDƏN
Tay təzə heç nə bilmirəm,
Yadımdan çıxıb köhnə də...
özüm də köçüb gəlmirəm -
Özüm də qaldım köhnədə!..
Qulağın dibi ağarıb,
Gözün də eynəyi tordu...
Kimsə torpağın çıxarır -
Yəqin ki, qazdığı gordu...
Səs də simə oturmur heç,
Söz də solub xəzəllənir...
Deyir növbə gözləmə, keç -
Taleh mənlə məzələnir...
Qarışıbdı acı, şirin
Ağızda tam, dad itibdi...
Qulağı səsdədi yerin -
Üstə bir fəryad itibdi...
Əldən çıxıb günün nəbzi,
Ümid qalıb çax-çaxlığa...
Allahım, göndər qəbzi -
İmkan yarad çaxmaqlığa!..
TƏSƏLLİ ŞEİRİ
Yaxınları, uzaqları bilinən
Dodaqları ad çəkməklə ilinən...
Kirpikləri təbəssümlə silinən -
Sənsən, Əbülfət!
Gecəsinə ağrı, acı, dərd sıxan
Gündüzünə göz qırpmadan dərd yığan...
Həsrətinə dözümdə də mərd çıxan -
Sənsən, Əbülfət!
Səsi batan, bəxti yatan bir aşiq
Pir olubdu, sevgisinə, pir aşiq...
Bu dünyada Məcnun kimi sirr aşiq -
Sənsən, Əbülfət!
İç dünyanı çöl dünyana üyütmə
Kədərini çox da öyüb böyütmə...
Yaşa haqla, sev Allahla, öyünmə -
Sən, sən - Əbülfət!
çap et