525.Az

“Heydər Əliyev və Azərbaycan kinosu” mövzulu konfrans keçirilib

“Nizami Kino” Mərkəzində Azərbaycan Dövlət Film Fondunun təşkilatçılığı ilə ümummilli lider Heydər Əliyevin anadan olmasının 91-ci ildönümünə həsr edilmiş “Heydər Əliyev və Azərbaycan kinosu” mövzusunda konfrans keçirilib.

Konfransda Azərbaycan Respublikası Kinematoqrafçılar İttifaqının sədri, Xalq artisti Şəfiqə Məmmədova, bu qurumun icraçı katibi, əməkdar incəsənət xadimləri Cəmil Quliyev, kinoşünas Aydın Kazımzadə, yazıçı Natiq Rəsulzadə çıxış edərək son illərdə ölkəmizdə mədəniyyətin inkişafı istiqamətində atılmış addımlardan, ümummilli lider Heydər Əliyevin mədəniyyət və incəsənət xadimlərinə, kino sahəsində çalışanlara göstərdiyi diqqət və qayğıdan, Azərbaycan kinosunun əldə etdiyi uğurlardan danışıblar: “Azərbaycan kinematoqrafçılarının yaradıcılığının reallaşmasında, layihələrinin işıq üzü görməsində, ümumən milli kinomuzun inkişafında kino işçiləri ordusunun ən etibarlı zamini, kinomuzun təəssübkeşi və hamisi, ümummilli liderimiz Heydər Əliyev olub. Ulu Öndər istər Azərbaycan SSR Dövlət Təhlükəsizliyi Komitəsinin sədri vəzifəsində işləyərkən, istərsə də Azərbaycan KP MK-nın birinci katibi olarkən mədəniyyətimizin inkişafına böyük qayğı göstərib. Ümummilli lider Heydər Əliyevin Azərbaycana rəhbərliyinin birinci dövründə –1976-cı ildə milli kinomuzun 60 illik yubileyinin keçirilməsi ilə bağlı kino işçilərinin böyük dəstəsinə fəxri adlar verilib. “Azərbaycanfilm”in texniki bazasını möhkəmləndirmək məqsədilə iri məbləğdə vəsait ayrılıb, kinostudiya üçün yeni avadanlıqlar alınıb: “Azərbaycanfilm”də müxtəlif vaxtlarda çəkilmiş bəzi filmlərin sovet ideologiyasının tələblərinə tam cavab vermədiyi üçün ekrana buraxılmamaq təhlükəsi yaranarkən kino işçilərinin köməyinə yenə də ümummilli liderimiz Heydər Əliyev gəlib və hər dəfə də bu problemi müsbət həll edib. “Bir cənub şəhərində” və “İstintaq” bədii filmlərini buna misal göstərə bilərik. “Şəhərin yay günləri” pyesinin ekranlaşdırılması, Sovet İttifaqı Qəhrəmanı Mehdi Hüseynzadənin şəxsiyyətinin araşdırılıb üzə çıxarılması, onun haqqında “Uzaq sahillərdə” filminin çəkilməsi ideyası da ulu öndər Heydər Əliyevə məxsusdur. Hətta Ulu Öndər “Babək” filminin istehsalı ilə bağlı Moskvanın verdiyi vəsaitdən əlavə filmə respublika büdcəsindən iki dəfə çox – bir milyon rubl ayırıb. Kinematoqrafçılarımız da Ulu Öndərimiz barədə bir sıra maraqlı filmlər çəkib və bu müqəddəs iş bu gün də uğurla davam etdirilir. Hər il avqustun 2-də Azərbaycan Kinosu Günü qeyd edilir”.

Tədbirdə vurğulanıb ki, əgər 2003-cü ildə Azərbaycan kinosuna bir milyon yarım manat vəsait ayrıldığı halda , hazırda bu məbləğ 7 milyon manat civarındadır. Əgər 2003-cü ildə Azərbaycanın kino sənayesində il ərzində 3-4 filmlə qənaətlənirdisə, son on ildə “Azərbaycanfilm” Kinostudiyasında 70-dən çox tam və qısametrajlı film çəkilib. Son 10 ildə Azərbaycan filmləri dünyanın 70-dən artıq ölkəsində 100-ə yaxın beynəlxalq festivallarda nümayiş etdirilib. Son 10 ildə Azərbaycan kinosu ilk dəfə olaraq dünya şöhrətli Kann festivalına qatılmaq imkanı əldə edib. Prezident İlham Əliyevin müvafiq sərəncamı ilə “Azərbaycan kinosunun 2008-2018-ci illər üzrə inkişafına dair Dövlət Proqramı” təsdiq olunub və müvafiq istiqamətdə bir çox mühüm işlər görülüb.

S.ABDULLAYEVA

09.05.2014

çap et