525.Az

“Heydər Əliyev və türk dünyası” müzakirə edilib

Beynəlxalq Mətbuat Mərkəzində (BMM) “Aşıq Şəmşir” Mədəniyyət Ocağı İctimai Birliyinin təşkilatçılığı ilə ulu öndər Heydər Əliyevin anadan olmasının 91 illiyinə həsr edilmiş “Heydər Əliyev və türk dünyası” mövzusunda konfrans keçirilib.

Milli Məclisin deputatları – Xalq şairi Sabir Rüstəmxanlı, Qənirə Paşayeva, İctimai Birliyin mətbuat xidmətinin rəhbəri Həbib Misirov və başqaları müstəqil Azərbaycanın memarı və qurucusu, ulu öndər Heydər Əliyevin xalqın təkidli tələbi ilə ikinci dəfə hakimiyyətə qayıdışından sonra ölkənin siyasi, iqtisadi və sosial bəlalardan xilas olduğunu, dünya ictimaiyyətinin Azərbaycanın müstəqilliyini birmənalı olaraq qəbul etdiyini bildiriblər.

Xalq şairi Zəlimxan Yaqub ulu öndər Heydər Əliyevin xatirəsinin həmişə ehtiramla yad olunacağını bildirib, ümummilli liderə həsr etdiyi “Əbədiyyət dastanı” poemasından bir parçanı oxuyub.

İstanbul-Azərbaycan Dərnəyinin rəhbəri Səfər Karakoyunlu ulu öndər Heydər Əliyevin türk dünyasının oğlu olduğunu və “Bir millət, iki dövlət” müdrik kəlamının müəllifi kimi hər iki qardaş xalqın ürəyində əbədi yaşayacağını söyləyib. Türkiyəli qonaq, həmçinin Azərbaycan Prezidenti İlham Əliyevə Türkiyədə və dünyanın bir çox yerlərində yaşayan türk qardaşlarımız adından təşəkkürünü bildirib. Praqa şəhərində Avropa İttifaqının “Şərq tərəfdaşlığı” Proqramının növbəti Sammiti zamanı Türkiyəni soyqırımı iddiaları ilə günahlandırmaq istəyən Ermənistan prezidenti Serj Sarkisyana “Türkiyə burada yoxdur, amma mən varam” deyərək, ulu öndər Heydər Əliyevin və Mustafa Kamal Paşa Atatürkün yolunun layiqli davamçısı olduğunu sübut etdiyini söyləyib.

Konfransda Dədə Şəmşirin Ulu Öndərə həsr etdiyi şeirlər əsasında çəkilmiş “Zərli tac kamallı başa yaraşır” adlı sənədli film nümayiş etdirilib. Sonda Azərbaycan-Türkiyə dostluq, qardaşlıq əlaqələrinin genişlənməsinə layiqli töhfələr vermiş Səfər Karakoyunluya “Aşıq Şəmşir” Mədəniyyət Mərkəzi İctimai Birliyinin “Təşəkkürnamə”si təqdim olunub.

S.ABDULLAYEVA

09.05.2014

çap et