Günay Əfəndiyeva Polşada bir sıra görüşlər  keçirib

Beynəlxalq Türk Mədəniyyəti və İrsi Fondunun prezidenti Günay Əfəndiyeva Polşaya işgüzar səfəri çərçivəsində orada yaşayan tatar icmasının rəhbəri, Polşanın Baş müftisi Tomasz Miskievicz ilə görüşüb. Görüşdə Azərbaycanın, Türkiyənin, Macarıstanın Polşadakı səfirləri və Qazaxıstanın Polşadakı səfir müavini, eləcə də tatar icmasının nümayəndələri iştirak ediblər.

Görüşdə XIV əsrdən Polşada məskunlaşan türk kökənli etnik azlıqlar olan tatarların çoxəsrlik tarixi və mədəni irsinin öyrənilməsi və qorunması yönündə müzakirələr aparılıb.

Günay Əfəndiyeva Avropa ərazisində, o cümlədən, Litvada və Polşada yaşayan tatar və karaimlərin mədəniyyətinin mühafizəsinin Fondun maraq dairəsində olduğundan söz açaraq, təşkilat tərəfindən bu istiqamətdə həyata keçirilən layihələrdən bəhs edib.

Polşanın Baş müftisi Tomasz Miskievicz, ötən il Fondun prezidenti ilə keçirilən görüşləri, eləcə də tatarların sıx məskunlaşdığı Belostok şəhəri və Sokoliki bölgəsinə edilən birgə ziyarətləri xatırladaraq, təşkilatın türk xalqlarının qədim mədəni dəyərlərin təbliği və təşviqi yönündəki fəaliyyətini yüksək qiymətləndirib. Tomasz Miskievicz, tatarların ölkədəki dini və sosial həyatları haqqında danışaraq,  onlara məxsus olan maddi və mənəvi abidələrin mühafizəsi və təbliği barədə məlumat verib. Müzakirələrdə Avropa məkanında Türk mədəniyyətinin təbliği ilə bağlı birgə əməkdaşlığın vacibliyi qeyd olunub.

Günay Əfəndiyeva səfər çərçivəsində  Frederik Şopen adına Varşava Musiqi Universitetinin rektoru Klaudiusz Baran ilə də görüşüb. G.Əfəndiyeva  türk xalqlarının çoxəsrlik mədəni-irsinin təbliği yönündə təşkilatın müxtəlif təhsil ocaqları ilə əməkdaşlığından bəhs edib. O, Fond ilə Polşanın, eləcə də Avropanın ən qədim və böyük universitetlərindən biri olan Frederik Şopen adına Varşava Musiqi Universiteti arasında gələcəkdə birgə layihələrin həyata keçirilməsinin önəmini vurğulayıb.

Universitetin rektoru Klaudiusz Baran, Türk Dünyasının maddi-mənəvi dəyərlərinin beynəlxalq səviyyədə tanıdılması istiqamətində Fond tərəfindən görülən işləri yüksək qiymətləndirib. Rektor Avropa və Türk dünyasının musiqisinin zənginliyindən söz açaraq, Universitetin Fond ilə əməkdaşlığı məmnuniyyətlə qarşıladığını nəzərə çatdırıb. Görüş gələcəkdə birgə layihələrin həyata keçirilməsinə dair fikir mübadiləsi ilə davam edib.