4 oktyabrda Bakı Dövlət Universitetinin Yeni tədris binasının akt zalında Beynəlxalq Türk Akademiyasının Monqolustanda həyata keçirdiyi arxeoloji tədqiqatlar nəticəsində aşkar olunan İkinci Göytürk Xaqanlığının qurucusu İltəriş Kutluq Xaqana aid olduğu düşünülən abidə kompleksi və daş kitabənin təqdimatı və fotosərgisi təşkil olunacaq.
Azərbaycan Milli Elmlər Akademiyasından (AMEA) 525.az-a verilən məlumata görə, tədbir AMEA, Elm və Təhsil Nazirliyi, Bakı Dövlət Universiteti və Beynəlxalq Türk Akademiyasının təşkilatçılığı ilə baş tutacaq.
Daş kitabənin özəlliyi “Türk” adının türkdilli tarixi qaynaqlarda qeydə alındığı ilk mənbə olmasıdır. Digər önəmli məqam kitabənin ötən əsrin sonlarında Orxon abidələrinin (Bilgə Xaqan, Kültegin, Tonyukuk) Qərb mütəxəssisləri tərəfindən kəşfi və tədqiqindən 130 il sonra öz arxeoloqlarımız - Türk Akademiyasının alimləri tərəfindən kəşf edilməsi və oxunmasıdır. Abidənin kəşfi Türk yazı tarixi və əlifbasının düşünüləndən daha qədim olduğunu isbat edir.
Təqdimat arxeoloji tədqiqat heyətindən Napil Bazylkhan və Enkhtur Altangerel tərəfindən ediləcək.
çap et