Bu günlərdə Moskvada Beynəlxalq Rus dili günü və Puşkinin anadan olmasının 215 illiyinə həsr olunmuş məktəblilər arasında XIII Beynəlxalq Rus dili olimpiadası baş tutdu. Olimpiada Rusiya Federasiyası Təhsil və Elm Nazirliyi, Rossotrudniçestvo Federal Agentliyi, Rus Dili və Ədəbiyyat Müəllimlərinin Beynəlxalq assosiasiyası və "Russkiy mir " fondunun dəstəyi ilə A.S.Puşkin adına Rus Dili İnstitutu tərəfindən keçirildi.
İntellektual olimpiadada dünyanın 29 ölkəsindən (Azərbaycan, Avstriya, Bolqarıstan, İzrail, Serbiya, Niderland, Çernoqoriya, Finlandiya və b.) 205 məktəbli və müəllim iştirak etdilər. Azərbaycanı Bakı Slavyan Universiteti Məktəb-Lisey Kompleksinin X sinif şagirdləri Babayev Rauf, Zeynalova İrana, Abbasov Hüseyn, Danoy Vladlena,VII sinif şagirdi Danoy Zlat, həmçinin 160 nömrəli Klassik gimnaziyanın X sinif şagirdi Novruzova Mayadan ibarət nümayəndə heyəti təmsil etdi. Nümayəndə heyətinə BSU Məktəb-Lisey Kompleksinin rus dili müəllimi Ayzatullin Rauf rəhbərlik edirdi.
BSU-nun və Məktəb-Lisey Kompleksinin təmayülünə uyğun olaraq slavyan dilləri, o cümlədən, rus dili və ədəbiyyatı üzrə keçirilən beynəlxalq tədbirlərdə və bilik yarışlarında iştiraka xüsusi önəm verən rəhbərlik üç ay ərzində şagirdlərin Beynəlxalq olimpiadaya hazırlaşması üçün xüsusi tədbirlər planı tərtib etmişdi.
Gərgin və maraqlı keçən bu intellektual yarışmanın sonunda Beynəlxalq olimpiadanın 10 nəfər mütləq qalibinin siyahısı açıqlandı. Ölkəmiz üçün fərəhləndirici haldır ki, bu mütləq qaliblərin sırasında həmyerlimiz Bakı Slavyan Universiteti Məktəb-Lisey Kompleksinin X sinif şagirdi Hüseyn Abbasov yer qazandı. Fəxri diplomla təltif olunmasıyla yanaşı, ona Rusiya Federasiyasının maliyyəsi ilə Rusiyanın aparıcı ali məktəblərində təhsil almaq hüququ verildi.
Digər şagirdlərimiz də bütün müsabiqə və imtahanlarda özlərini layiqincə göstərərək diplom və sertifikatlarla təltif olundular. Babayev Rauf, Zeynalova İrana, Novruzova Maya I yer,Danoy Zlata və Danoy Vladlena isə III yerə layiq görüldülər.
Günay ƏLİYEVA
çap et