Zal nəzarətçisi sertifikatı əldə etmək istəyən şəxslər üçün müsahibə və ilkin test imtahanı mərhələləri davam edir.
Dövlət İmtahan Mərkəzinin(DİM) mətbuat xidmətindən 525.az-a verilən məlumata görə, müsahibələr DİM-in Bakıda yerləşən inzibati binasında və rayonlarda olan regional bölmələrində mərkəzin məsul əməkdaşları tərəfindən aparılır. Qeydiyyatdan keçmiş 2785 namizəddən bu günə qədər 1872 nəfəri müsahibədə iştirak edib və onlardan 1670-i uğurlu nəticə əldə edərək növbəti mərhələdə iştirak etmək hüququ qazanıb. Müsahibədən məqbul alan namizədlər psixometriya və ümumi intellekt səviyyəsinin yoxlanılması üçün test imtahanına növbəli şəkildə dəvət edilirlər.
Müəyyən olunmuş qrafikə uyğun olaraq bu günə qədər ilkin test imtahanına 571 namizəd dəvət edilib. Ümumi intellekt səviyyəsinin yoxlanılması üçün imtahan 1 saat davam edir və namizədlər imtahandan dərhal sonra nəticələri ilə tanış olurlar. Bu imtahan namizədlərdə söz ehtiyatının zənginliyi, sözlə ifadə olunmuş məlumatı müqayisə etmə və ümumiləşdirmə, vizual məlumatı təhlil etmə, eləcə də riyazi təfəkkürün inkişaf səviyyəsini qiymətləndirməyə kömək edir.
Psixometrik test imtahanının müddəti isə 35 dəqiqədir. Bu imtahanda namizədlərin stressə qarşı emosional davamlılığı, özünütənqid və sosial idarəetmə qabiliyyəti, eləcə də çətin situasiyalarda qərar vermə bacarığı yoxlanılır.
Ümumi intellekt səviyyəsinin yoxlanılması üçün imtahanda minimum 40 faiz nəticə göstərən və psixometrik testlərin nəticəsi məqbul olan namizədlərə təlimlərdə iştirak etməklə bağlı bildiriş göndərilir.
Xatırladaq ki, zal nəzarətçisi sertifikatı əldə etmək üçün qeydiyyata oktyabrdan başlanılıb və ümumi prosesin fevral ayında yekunlaşdırılması nəzərdə tutulur.
Sevinc Qarayeva
çap et