Kitab nəşrində qarşıya çıxan problemlər “Redaktorlar Klubu”nda müzakirə edilib
525.az xəbər verir ki, ANAİB-in tərkibində yaradılmış “Redaktorlar Klubu”nun “XAN Nəşriyyatı”nda növbəti toplantı və seminarı keçirilib. Nəşriyyatlarda iş prosesi zamanı qarşıya çıxan müxtəlif problemlərin müzakirəsinə həsr edilən və müəyyən məsələlərlə bağlı ortaq qərarların çıxarılmasına istiqamətlənmiş budəfəki görüş xarici dillərdən tərcümə edilən mətnlərdə, xüsusilə dünya ədəbiyyatı nümunələrində xüsusi adların yazılışına həsr olunub. Qeyd edilib ki, dəqiq və istisnasız bir qayda olmadığından bu problem, adətən, tərcüməçilər və redaktorların şəxsi seçimi əsasında həll edilir.
Bu isə nəticədə müxtəlif nəşriyyatlarda çap olunan kitablarda eyni müəllifin adının fərqli şəkildə yazılması ilə nəticələnir.
Mövzu ilə bağlı təqdimat hazırlayan “Qədim Qala” nəşriyyatının baş redaktoru Sevda Məmmədova mövcud problemləri dilə gətirib, dünya praktikasında bu cür problemlərin hansı şəkildə aradan qaldırıldığını ifadə edib. Problemin yalnız müəllif adları ilə məhdudlaşmadığını, bir sıra xüsusi adlara, məşhur nağıl personajlarına və s. də aid olduğunu bildirib. Daha sonra tədbirdə iştirak edən “XAN”, “Parlaq imzalar”, “Şərq-Qərb”, “İz”, “Qədim Qala”, “Altun kitab”, “TEAS Press” və “Libra kitab” nəşriyyatlarının redaktor və baş redaktorları müzakirəyə qatılıblar. Xüsusi isimlərin və adların Azərbaycan dilinə uyğunlaşdırılması ilə bağlı müəyyən ortaq razılığa gəlinib və nəticələr bəndlər şəklində ümumiləşdirilib. Qərara alınıb ki, detallar tam şəkildə dəqiqləşdirildikdən, təcrübədə qarşıya çıxan bu problemlə bağlı mütəxəssislərin də rəyi alındıqdan sonra mətbuatda təkliflə çıxış edilsin və gəlinən qənaətlər Azərbaycan Milli Elmlər Akademiyası Nəsimi adına Dilçilik İnstitutuna da təqdim olunsun.
Görüşdə bu cür müzakirələrin davamlı olması, təcrübədə qarşıya çıxan digər problemlərin də ümumiləşdirilməsi, eləcə də müzakirəyə çıxarılıb həll edilən problemlərlə bağlı nəşriyyat işçiləri üçün nəzərdə tutulan qaydalar toplusunun nəşrə hazırlanması da qərara alınıb.
çap et