Bakı Şəhəri üzrə Təhsil İdarəsi (BŞTİ) vətəndaşlarla iş və vətəndaş müraciətlərinə baxılması məsələlərinə hər zaman həssas münasibət göstərir. Bu istiqamətdəki fəaliyyətdə "Vətəndaşların müraciətləri haqqında" Qanun əsas götürülür.
BŞTİ-nin vətəndaş müraciətlərinə baxılması və vətəndaşların qəbulu ilə bağlı həyata keçirdiyi sistemli islahatlar yalnız bir məqsədə-vətəndaş məmnunluğunun təmin olunmasına və insanları narahat edən problemlərin tam olaraq aradan qaldırılmasına xidmət edir. Tətbiq olunan mütərəqqi yeniliklər imkan verir ki, vətəndaşları narahat edən hər bir problem aradan qaldırılmaqla yanaşı, həm də onları doğuran səbəblər müəyyən olunsun, son nəticədə vətəndaşlar onlara göstərilən qayğıdan daha real və səmərəli şəkildə faydalansınlar.
BŞTİ-nin ümumi sektor müdiri Sevinc Rəsulova deyir ki, 2016-cı ilin yanvar ayından fəaliyyət göstərən vahid Qəbul Portalı Elm və Təhsil Nazirliyinə və tabe qurumlara müraciət edən vətəndaşların vəzifəli şəxslər tərəfindən qəbulunun asanlaşdırılması, qəbula yazılma prosesinin təkmilləşdirilməsi, müraciətlərə baxılmasının sürətləndirilməsi və keyfiyyətinin yüksəldilməsi, eyni zamanda, məlumatların ümumiləşdirilməsi məqsədlərinə xidmət edir. Portalın fəaliyyəti sayəsində vətəndaşların qəbula yazılması, yönləndirilməsi, prosesin müşahidəsi, SMS göndəriş sistemi vasitəsilə vətəndaşlarla əks-əlaqə yaradılaraq qəbulun keçirilmə vaxtı barədə məlumatlandırma və vətəndaş məmnunluğunun öyrənilməsi təmin olunur.
Portalı həm də vəzifəli şəxslərin vətəndaşlarla ünsiyyətinin güzgüsü hesab edə bilərik. Belə ki, vətəndaşların qəbulu zamanı onlara verilən hər bir cavab portala qeyd olunur. Qəbuldan sonra Elm və Təhsil Nazirliyi tərəfindən vətəndaşla əlaqə saxlanır, qəbuldan razı qalıb-qalmadığı öyrənilir və yenə portala əlavə olunur: "Onu da qeyd edim ki, 2017-ci ildə BŞTİ-nin Vətəndaşların Qəbulu Mərkəzi və Telefon Məlumat Mərkəzi əsaslı yenidənqurmadan sonra istifadəyə verilib. Hər iki mərkəz təhlil imkanına malik informasiya sistemləri ilə təmin olunub. Vətəndaşların Qəbulu Mərkəzinə və Çağrı Mərkəzinə müraciət edən vətəndaşlara metodiki və maarifləndirici məlumatlar verilir, onlara müxtəlif növ hüquqi yardımlar göstərilir. Hər iki mərkəzin fəaliyyəti üzrə toplanan statistik məlumatlar əsasında müvafiq hesabatlar hazırlanır. Xidmət səviyyəsinin və keyfiyyətin yüksəldilməsi üçün video-audio nəzarət aparılır və hər bir əməkdaşın fəaliyyəti nəzarətdə saxlanılır. Həmçinin, BŞTİ-nin Vətəndaşların Qəbulu Mərkəzində və Çağrı Mərkəzi vasitəsilə BŞTİ-də çalışan vəzifəli şəxslərin qəbuluna yazılmaq mümkündür. Özündə "Vətəndaş qəbulu" ,"Çağrı Mərkəzi", "Vətəndaş müraciətlərinin cavablandırılması" kimi üç böyük sahəni birləşdirməklə vətəndaşlarla iş istiqaməti üzrə 133613 vətəndaşa xidmət göstərilmişdir".
Sevinc Rəsulovanın dediyinə görə, Bakı Şəhəri üzrə Təhsil İdarəsinin Ümumi sektoru Prezidentin 27.08.2003-cü il tarixli Fərmanı ilə təsdiq edlən "Dövlət hakimiyyəti orqanlarında, idarə, təşkilat və müəssisələrində kargüzarlığın aparılmasına dair Təlimat"ı, Prezidentin Fərmanı ilə təsdiq olunmuş "Dövlət orqanlarında, dövlət mülkiyyətində olan və paylarının (səhmlərinin) nəzarət zərfi dövlətə məxsus olan hüquqi şəxslərdə və büdcə təşkilatlarında kargüzarlığın aparılmasına dair Təlimat"ı (bundan sonra - Təlimat), "Vətəndaşların müraciətləri haqqında" qanunu, BŞTİ-nin "Vətəndaşların səyyar qəbulu işinin təkmilləşdirilməsi barədə" əmri və s. rəhbər tutaraq vətəndaşların qəbulu prosesinin səmərəli təşkil edilməsi, onların hüquqlarının həyata keçirilməsinin təmin edilməsi və bu sahə üzrə digər qanunvericilik aktlarını, BŞTİ-nin, həmçinin, Ümumi sektorun Əsasnaməsini rəhbər tutaraq 8 istiqamət üzrə fəaliyyət göstərib.
Sektor müdiri qeyd edib ki, hesabat dövrü ərzində BŞTİ-nin rəhbər vəzifəli şəxslər tərəfindən vətəndaşların qəbulu cədvəli tərtib və təsdiq edilib. BŞTİ sektorları əməkdaşlarının "Vətəndaşların Qəbulu Mərkəzi"ndə fəaliyyəti üçün növbətçilik cədvəli tərtib və təsdiq olunub. "Təhsil Nazirliyində və tabe qurumlarında vətəndaşların qəbulu və ona nəzarət üzrə online sistem - portal" vasitəsilə BŞTİ-də vətəndaşların video-qəbulu təşkil edilib, 06.03.2022-ci ilə qədər fəaliyyət göstərib (Pandemiya bitənə qədər). Qeyd edilən tarixdən sonra vətəndaşların qəbulu prosesi bərpa olunub. Bu ilin mart ayından "Vətəndaşların Qəbulu Mərkəzi" fəaliyyətini bərpa edib. "Vətəndaşların Qəbulu Mərkəzi" fəaliyyətini təkmilləşdirmək üçün "Google Doc" üzərindən data baza yaradılıb. Vətəndaş müraciətlərinin cavablandırılması, müxtəlif mövzuları əhatə edən vətəndaş müraciətllərinin zamanında və qanunauyğun cavablandırılması işi təşkil olunub. BŞTİ-də müraciətlərin qəbul edilməsi və cavablandırılması işinin elektron formada həyata keçirilməsi məqsədilə hazırlanıb yeni təkliflər mərhələlərlə sınaqdan keçirilib: "Vətəndaş məmnunluğunun təmin edilməsi, ETN-ə daxil olan müraciətlərin cavablandırılması zamanı koordinasiyanın düzgün təşkili və proseslərin çevik idarə edilməsi, habelə TN-ə daxil olan müraciət sayının və "Çağrı Mərkəzi"nin iş həcminin optimallaşdırılması, bu sahədə hesabatlılığın təmin edilməsi məqsədilə sentyabr ayından BŞTİ Çağrı Mərkəzi yaradılıb".
Sevinc Rəsulovanın dediyinə görə, özündə "Vətəndaş qəbulu", "Çağrı Mərkəzi" xidməti, "Vətəndaş müraciətlərinin cavablandırılması" kimi üç böyük sahəni birləşdirməklə vətəndaşlarla iş istiqaməti üzrə 133613 vətəndaşa xidmət göstərilib. ETN-nin Qəbul portalı (qebul.edu.az) vasitəsilə qəbula yazılan 2099 vətəndaşın "Vətəndaşların Qəbulu Mərkəzi"ndə 23641 vətəndaşın BŞTİ-nin rəhbər vəzifəli şəxslərinin qəbulu həyata keçirilib. Vətəndaş məmnunluğu təmin olunub: "Vətəndaşlara göstərilən keyfiyyətli xidmətin təkmilləşdirilməsi və bu sahədə dəqiq statistik hesabatların verilməsi üçün gərəkli olan Çağrı Mərkəzi işini müvəffəqiyyətlə davam etdirib. Telefon Məlumat Mərkəzində 83270 zəng qəbul edilib. Şikayət xarakterli müraciətlər mövzusundan asılı olaraq araşdırma üçün müvafiq sektorlara yönləndirilib. 3 iş günü ərzində araşdırılması mümkün olan müraciətlərin cavabı vətəndaşlara verilib. BŞTİ rəhbərliyinə hər ay hesabat verilib. BŞTİ-yə il ərzində daxil olmuş 142453 müraciətdən 133613 vətəndaş müraciəti olub. Vətəndaş müraciətlərinin əksəriyyəti dərhal cavablandırılmış və problem operativ həll edilib. Sənəd dövriyyəsini əks etdirən statistik məlumatlar hazırlanmışdır. İl ərzində 142453 elektron və yazılı sənəd daxil olub. Poçtla daxil olan sənəd sayı 1964-dür".
Sektor müdiri əlavə edib ki, "Dövlət sirri haqqında" qanuna uyğun olaraq, dövlət sirrinin və məxfilik rejiminin qorunması üçün zəruri tədbirlər görülüb, BŞTİ-nin fəaliyyəti nəticəsində əldə olunan məlumatların sərəncamçısı səlahiyyəti həyata keçirilmiş, məlumatların səlahiyyət olmadan əldə edilmək, məhv edilmək, modifikasiyalaşdırılmaq, bloklaşdırılmaq, başqasına ötürülmək, yayılmaq, surəti çıxarılmaq kimi hallardan qorunması işi təşkil edilib. Qanunvericiliklə müəyyən edilən digər istiqamətlərdə fəaliyyət göstərilib. Funksional fəaliyyətə uyğun olaraq müxtəlif tədbirlərdə iştirak edilib, Xidməti fəaliyyətlə bağlı BŞTİ rəhbərliyi tərəfindən verilən tapşırıqların vaxtında dəqiq icrası təmin olunub.
Görülməsi nəzərdə tutulan işlər barədə söz açan Sevinc Rəsulova vurğulayıb ki, sektorun fəaliyyət istiqamətləri üzrə cari planlaşdırma aparılması, BŞTİ-yə tabe müəssisələrdə və Xidmət Əməliyyat Mərkəzlərində kargüzarlıq fəaliyyətinin mexanizmini təkmilləşdirmək məqsədi ilə Elm və Təhsil Nazirliyinə təkliflər vermək, BŞTİ-yə tabe uşaq bağçalarında "Microsoft Outlook" - elektron poçt vasitəsi ilə məktub almaq və məktub göndərmək üçün istifadə edilən proqramı tətbiq etmək planlaşdırılır. Həmçinin, BŞTİ-yə tabe müəssisələri üçün əmr və protokol kitabları, çıxış sənədləri üçün blank sifariş etmək, BŞTİ-nin "Vətəndaşların Qəbulu Mərkəzi"ndə prosesin səmərəli təşkili məqsədilə "Vətəndaşların qəbuluna dair" qaydaların tərtib olunması, BŞTİ-nin rəhbər vəzifəli şəxsləri tərəfindən keçiriləcək vətəndaşların qəbulu işini təkmilləşdirmək və optimallaşdırmaq nəzərdə tutulub.
Sevinc QARAYEVA
çap et