Avropa İttifaqı (Aİ) Komissiyası İttifaqın sərhədləri daxilində avtomobil sürücüləri üçün sürücülük vəsiqələrinin rəqəmsallaşdırılması ilə bağlı təklif hazırlayıb.
525.az xarici mediaya əsasən xəbər verir ki, nəqliyyatdan məsul komissar Adina Valean Aİ Komissiyası üzvlərinin yol təhlükəsizliyi ilə bağlı iclasından sonra hazırlanan təklifləri açıqlayıb.
Komissiyanın təklifləri arasında dünyada ilk dəfə tətbiq olunacağı bildirilən “rəqəmsal sürücülük vəsiqəsi”nə keçid də var. Təklifə əsasən, Aİ üzvləri arasında sürücülük vəsiqələrinin qarşılıqlı tanınmasını asanlaşdırmaq üçün rəqəmsal sistem tətbiq ediləcək. Rəqəmsal lisenziyalar mövcud olduqda, onlara mobil telefondan və ya digər rəqəmsal cihazdan daxil olmaq mümkün olacaq və bütün Aİ-də etibarlı olacaq.
Aİ daxilində sürücülük vəsiqələrinin rəqəmsallaşdırılması üçün minimum tələblər daha sonra müəyyən ediləcək. Müəyyən ediləcək uyğunlaşdırma prosesindən sonra lisenziyalar tamamilə rəqəmsallaşdırılacaq. Arzu edənlər kartda rəqəmsaldan əlavə sürücülük vəsiqəsini çap etdirə biləcəklər.
Qeyd edək ki, alınan lisenziyaların Aİ daxilində hansı ölkələrdə etibarlı olacağı və əlavə imtahanların və ya təlimlərin tələb olunacağı daha sonra müəyyən ediləcək. Rəqəmsal sürücülük vəsiqəsinə keçid üçün 4 il müddət nəzərdə tutulub. Aİ Komissiyası rəqəmsal keçid qaydalarını təklifin qəbulundan sonra 18 ay ərzində qəbul etməyi hədəfləyib. Aİ Komissiyasının təklifinin qanuna çevrilməsi üçün o, üzv dövlətlər və Avropa Parlamenti tərəfindən də qəbul edilməlidir.
Malik Atilay
çap et