Ermənistandakı Rusiya hərbi bazası təlimlərin yeni mərhələsinə başlayıb

Ermənistanın Gümrü şəhərində yerləşən 102-ci Rusiya hərbi bazasında kompleks təlimlərin yeni mərhələsi start götürüb.

“Media forum” saytı “Armtoday.info” ya istinadla xəbər verir ki, hərbi baza kontingentinin 70%-nin iştirakı ilə iyulun 1-dən başlanan təlimlər hazırda Alagöz və Kamxud poliqonlarında minaaxtaran xidmətin xüsusi məşğələləri ilə davam etdirilir. Həmin təlimlərə 10-dan çox xüsusi hərbi texnika, partlayış maddəsini aşkarlaya bilən itlərlə təmin edilmiş 100 hərbçi cəlb olunub.

2010-cu ildə Gümrüdəki Rusiya hərbi bazasına dair 1995-ci ildə Rusiya ilə Ermənistan arasında bağlanmış müqaviləyə dəyişiklik edilib, hərbi bazanın dislokasiya müddəti 2046-cı ilədək uzadılıb. 1995-ci ildəki müqavilə 25 illiyə bağlanmışdı.