16 mart tarixində Firidun bəy Köçərli adına Respublika Uşaq Kitabxanasında fantastik hekayələrin müəllifi, uşaq yazarı, pedeqoq Reyhan Yusifqızı ilə 7 saylı məktəb şagirdlərinin görüşü keçirilib.
525.az xəbər verir ki, görüş zamanı elmi fantastik janrda olan trilogiya müəllifi Reyhan Yusifqızı məktəblilərə “Uzaq planetin sirri”, “Yaşıl gözlü qız” , “Diribaş qızlar klubu” , “Aysu” , “Pəncərəni kim sındırdı” , “Kompüterin qəribə tarixi” , “Yaramaz dənizanaları” , “Məstan və Babu” , “Zamanın əsirləri” və digər kitablarından bəhs edib. Uşaqların böyük marağına səbəb olan “Yaşıl gözlü qız” müəllifin elmi-fantastik janrda yazılmış birinci kitabıdır.
Müəllif qeyd edib ki, kitab kosmik qəza nəticəsində Yer planetinə düşmüş 12 yaşlı yadplanetli qızın - Leminin sərgüzəştlərindən bəhs edir.
Yazıçı müasir dövrün əsas tələblərindən biri olan kompüterlərin yaranması haqqında məlumat verib, “Kompüterin qəribə tarixi” kitabını şagirdlərlə müzakirə edib.Şagirdlər eyni zamanda, kompüterlərin qədimdən bizim dövrlərə qədər keçən tarixinin inkişaf mərhələlərini, bir çox maraqlı epizodlar, məşhur kəşflər, qəribə faktlar, alim və ixtiraçılar, onların həyatı haqqında maraqlı məlumatlara yiyələnib.
Yazıçı həmçinin, balaca oxucuların marağına səbəb olan sualları ətraflı cavablandırıb.
Sonda R.Yusifqızı “Qapı arxasında O” və bir neçə yeni nəşr olunmuş kitablarını Respublika Uşaq Kitabxanasına hədiyyə edib.
Tədbirin keçirilməsində əsas məqsəd uşaqların gələcək həyatına yeni dəyərlər gətirmək, tez-tez dəyişən, inkişaf edən rəngarəng dünyamızda uşaqların mütaliə aləmini zənginləşdirmək, dünyagörüşünü artırmaq, yeniliklərə qarşı onların daha savadlı, daha zəkalı böyüməsinə təkan verməkdən ibarətdir.
çap et