Qazaxıstanda üz qabığı insan dərisindən hazırlanmış, Fransadakı institutda 330 səhifədən yalnız 10-u deşifrə edilə bilən qədim latın əlyazması hələ də sirr olaraq qalır.
525.az xəbər verir ki, əlyazma paytaxt Astanada Milli Akademik Kitabxananın Nadir Nəşrlər Muzeyində nümayiş etdirilir. 1532-ci ildə qədim latın dilində yazılmış, insan kürəyinin dərisi ilə örtülmüş 330 səhifəlik əsərin yalnız 10 səhifəsini oxumaq mümkün olub.
Milli Akademik Kitabxananın Elm şöbəsinin mütəxəssisi Möldir Tölepbay bildirib ki, əlyazma 2014-cü ildə şəxsi kolleksiyaçı tərəfindən kitabxanaya hədiyyə edilib və o vaxtdan muzeydə sərgilənir.
Tölepbay, bu gün istifadə edilməyən, lakin əsrlər əvvəl adi hal olan kitab örtmə üsulu ilə edilən işi görmək üçün çox sayda ziyarətçini qəbul etdiklərini qeyd edib. “Bu üsul dünyada antropodermik kitab bağlama kimi tanınır, yəni, kitabın cildlənməsi üçün insan dərisindən istifadə olunub”, - mütəxəssis deyib.
Malik Atilay