Yaxşı təhsil parlaq gələcəyin təminatıdır. Hansısa ölkənin vətəndaşları nə qədər təhsilli, savadlı olarsa, orada inkişaf, rifah səviyyəsi də bir o qədər yüksək olur. Bundan başqa təhsilli, savadlı insanlar cəmiyyətin aparıcı qüvvələri kimi həmişə hörmətlə qarşılanır. Ancaq təhsil asanlıqla əldə olunan bir nemət deyil. Bunun üçün davamlı şəkildə oxumalı, zəhmət çəkməlisən. Seyid Əzim Şirvani yazırdı ki, təhsil xəzinədir, əmək onun açarı. Təhsil mərhələli bir prosesdir. İbtidai, orta təhsildən sonra gənclər savadın ali dərəcəsinə universitetlərdə, institutlarda yiyələnirlər. Azərbaycanda da yüksək təhsil verən, savadlı, elmli insanlar yetişdirən xeyli sayda dövlət və özəl ali məktəblər var. İnkişaf etmiş, yüksək təhsil səviyyəsi ilə seçilən ali məktəblərdən biri də Qərb Universitetidir. Qərb Universiteti ilk özəl ali təhsil müəssisələrindən biri kimi, 1991-ci ildə Bakıda yaradılıb. Universitetin yaradılmasının əsas məqsədi müstəqil Azərbaycanın iqtisadi, ictimai-siyasi və beynəlxalq inkişafına yardım etmək üçün ali təhsilli mütəxəssislərin hazırlanmasıdır.
Hal-hazırda da sözügedən universitet çoxsaylı professor- müəllim heyəti ilə müasir tələblərə, dünya və Avropa təhsil standartlarına uyğun olacaq səviyyədə mütəxəssislərin hazırlığı ilə məşğuldur.
Qərb Universtitetinin rektoru, dosent Zenfira Məmmədova bizimlə müsahibədə son dövrlərdə adıçəkilən ali məktəbin uğurları, əldə etdiyi nailiyyətlər, görülən işlər barəsində söhbət açdı. Rektor bildirdi ki, Qərb Universitetinin fəaliyyət istiqamətinin əsasını yüksək ixtisaslı, bacarıqlı və peşəkar mütəxəssislərin hazırlanmasına yönəlmiş ali təhsil üzrə fəaliyyət təşkil edir: “Biz öz fəaliyyətimizdə Konstitusiyamızı, təhsil qanunvericiliyini, Nizamnaməni və digər normativ aktları rəhbər tuturuq. Universitetdə mütəxəssislər və elmi-pedaqoji kadr hazırlığı üç səviyyədə- bakalavriat, magistratura və doktorantura olaraq həyata keçirilir. Universitetimiz təhsillə yanaşı, bir elm mərkəzi kimi də fəaliyyət göstərir. Universitetin nəzdində elmi-tədqiqat mərkəzləri, tədris prosesi ilə bağlı olan elmi fəaliyyət, layihələr üzrə əməkdaşlıq çərçivəsində elmi tədqiqatların aparılması, tələbələrin elmi cəmiyyətləri çərçivəsində elmi-tədqiqat işləri təşkil olunaraq inkişaf etdirilir. Bu ali məktəbin fəaliyyətinin istiqamətləri arasında idarəçiliyin təşkili və həyata keçirilməsi, o cümlədən xarici əlaqələr üzrə fəaliyyət mühüm yer tutur”.
Z.Məmmədova qeyd etdi ki, Qərb Universitetinin fəaliyyətinin əsasını müasir innovativ təhsil modellərinə, Avropa təhsil standartlarına və milli təhsil ənənələrinə əsaslanan ali təhsil sistemi yaratmaq yolu ilə hərtərəfli biliyə, bacarığa və zəruri vərdişlərə sahib olan yüksək ixtisaslı ali təhsilli mütəxəssislər hazırlamaq təşkil edir. Rektor hər bir ali təhsil müəssisəsinin özünəməxsus fəlsəfəsi olduğunu vurğuladı: “Qərb Universiteti öz fəlsəfəsini reallaşdırmaq üçün aşağıdakı vəzifələri yerinə yetirir : hər bir şəxsin intellektual, mədəni və mənəvi inkişafı, ali təhsilalma tələblərinin ödənilməsi; təlim-tərbiyə prosesinin yüksək səviyyədə təşkil edilməsi; elmi araşdırmaların aparılması; yüksəkixtisaslı elmi-pedaqoji, elmi kadrların hazırlanması; ixtisasartırma və kadrların yenidən hazırlanmasının təmin edilməsi; qanunvericiliklə müəyyən edilmiş qaydada təhsil, mədəni-maarif, nəşriyyat, müalicə-diaqnostika, maliyyə-iqtisad, təsərrüfat, elmi-istehsalat sahələri üzrə kommersiya fəaliyyəti ilə məşğul olunması; beynəlxalq fəaliyyətin və xarici əlaqələrin təmin edilməsi”.
Müsahibimiz diqqətə çatdırdı ki, müraciət etdikləri beynəlxalq layihələrin əksəriyyətinin koordinatorlarından müsbət cavablar alırlar: “Tələblərə müvafiq olaraq həmin layihələr üçün application və bir sıra sənədlər tərəfimizdən hazırlanıb koordinatorlara təqdim olunub, Annex imzalanıb göndərilib. Erasmus Mundus layihəsi üzrə tərəfdaş olduğumuz layihələr müsabiqədən uğurla keçib, konsorsiumişə başlayıb və artıq I kampaniyanın nəticələri müəyyənləşib. Bu layihələr Yunanıstan, Rumıniya kimi ölkələrlə əməkdaşlığı nəzərdə tutur. Bundan başqa, Erasmus Mundus EFFORT proqramı üzrə bakalvr pilləsində 3 tələbəmiz Böyük Britaniya, Latviya və Portuqaliyanın universitetlərində növbəti il üçün təhsillərini davam etdirəcəklər. Magistratura pilləsində bir məzunumuz bu proqram üzrə qrant qazanıb və Sheffield Universitetinin Thessaloniki filialında 2 il tam dərəcə magistr təhsili alacaq. Həmçinin bir müəllimimiz 6 ay müddətində doktorluq sonrası tədqiqat aparmaq üçün Yunanıstana səfər edəcək. Bundan əlavə 2014-2015 tədris ilində Portuqaliyanın Viana do Castelo Politexnik İnstitutundan Turizm ixtisası üzrə bakalavr səviyyəsində təhsilini davam etdirmək üçün 1 tələbəvə 1 ay müddətinə təcrübə keçmək üçün 1 müəllim gələcək.
2014-2016-cı illər ərzində statistikanın tədrisinin interaktiv on-line ərizələrlə gücləndirilməsi layihəsi həyata keçiriləcək. Layihənin məqsədi Azərbaycanda statistika fənninin müasir vasitələrlə müasirləşdirilməsi və səviyyəsinin artırılmasıdır. Layihənin kordinatoru ADA Universitetidir. Tərəfdaş təşkilatları Qərb, Bakı Dövlət, Xəzər və Bakı Slavyan Universitetləridir. Erasmus Mundus EFFORT proqramı çərçivəsində Qərb Universitetilə koordinator təşkilat olan ATEI Thessaloniki və konsorsiuma daxil olan universitetlərlə saziş bağlanıb. Latviyanın Daugavpils Universitetiilə 2014-cü ilin aprel ayında anlaşma memorandumu imzalanıb. Bundan əlavə Sarbonne Paris-1 University, La Rochelle Business School, Polşanın Lodz Universiteti, Ukraynanın Ternopil Milli İqtisad Universiteti, Qafqaz Universiteti ilə gələcək əməkdaşlıqla bağlı danışıqlar aparılır”.
Ali məktəbin rəhbərinin dediyinə görə, universitet ölkədə və xaricdə çoxsaylı tədbirlərin təşkilatçısı və iştirakçısıdır: “ Xarici əlaqələr şöbəsinin müdiri Vəsilə Hacıyeva British Council, Amerika Mərkəzi, Azərbaycan Diplomatiya Akademiyası və s. qurumların təşkil etdiyi beynəlxalq tədbirlərdə universitetimizi təmsil edib, gələcək digər əlaqələr və əməkdaşlıqlar axtarışında olub. Həmçinin universitetimizdə çoxsaylı beynəlxalq tədbirlər təşkil olunur. Keçən ilin oktyabr ayında Qərb Universitetində Dağçılıq və Dırmanma üzrə Beynəlxalq Federasiyasının (UIAA) təşəbbüsü, IDEA Kampaniyası, Qərb Universiteti, Azərbaycan Dağçılıq və Ekstremal İdman Növləri Federasiyaları Assosiasiyası və Azərbaycan Hava və Ekstremal İdman Növləri Federasiyasının (FAİREX) birgə təşkilatçılığı ilə “Dünyanın dağlıq regionlarında turizmin davamlı inkişafı üçün dağ idman növlərinin Qafqaz nümunəsində mühüm rolu” mövzusunda Beynəlxalq Konfrans keçirilib. Universitetimizdə 2013-cü ilin noyabrında “Kuba Mədəniyyəti Dünya sivilizasiyası kontekstində” mövzusunda beynəlxalq kulturoloji seminar keçirilib. Seminar “Simurq” Azərbaycan Mədəniyyəti Assosiasiyası, Azərbaycan Kulturologiya Cəmiyyəti və Qərb Universiteti tərəfindən birgə təşkil olunub. Ötən ilin noyabrında 2013-cü ildə Azərbaycan Diplomatiya Akademiyası Qərb Universiteti ilə qarşılıqlı əməkdaşlıq çərçivəsində təqdimat mərasimi keçirdi. Noyabrın 7-də, 2013-cü ildə BMT-nin Bakı ofisində Qərb universitetinin tələbələri ilə görüş keçirilib. Mütəmadli olaraq xarici ölkələrin Azərbaycandakı səfirləri ilə görüşlər təşkil olunur”.
Z.Məmmədova söylədi ki, universitet dünyanın tanınmış ali məktəbləri ilə birgə beynəlxalq proqramlarda və regional layihələrdə iştirak edir: “ABŞ-ın Şimali Karolina, Kanzas, Birləşmiş Krallığın Kent, Almaniyanın Siqen, Kanadanın Vinnipeq, Finlandiyanın Vaasa universitetləri, İngiltərənin (London) LİTE, Moskvanın Mirbis institutları, Amerika Beynəlxalq Təhsil Şurası (ACTR/ACCEL) arasında qarşılıqlı əməkdaşlıqla bağlı razılıq müqaviləsi əldə olunub”.
Rektor hərdən cəmiyyətdə hallandırılan-bəzi özəl ali məktəblərə aşağı balla qəbul məsələsinə münasibət bildirərək dedi ki, qəbul zamanı toplanan ballar orta məktəbdəki təhsilin nəticəsi və qiymətidir: “Digər tərəfdən TQDK-nın müəyyən etdiyi minimum bal həddi bütün universitetlər üçün nəzərdə tutulur. Daxil olan tələbələrin necə təhsil alması və gələcəkdə necə bir mütəxəssis kimi yetişməsi isə artıq universitetdəki təhsil səviyyəsini əks etdirir. Universitetimizdə 200-600 aralıqda bal toplayan, o cümlədən də dövlət sifarişi ilə təhsil alan tələbələr var. Fikrimizcə, əsas göstərici məzunların əldə etdiyi naliyyətlərdir. Gəncin universitetə hansı balla girməsi yox, ali məktəbi bitirəndə hansı hazırlıq səviyyəsi ilə bitirməsi nəzərə alınmalıdır. Qərb Universitetinin yeganə məqsədi yüksək səviyyəli və hazırlıqlı mütəxəssislər yetişdirməkdir”.
Həmsöhbətimiz universitetin nəzdində orta məktəbin də fəaliyyət göstərdiyini diqqətə çatdırıb: “Məktəbin əsas məqsədi zamanın dəyişən tələblərinə cavab verən, istedadlı, hərtərəfli və bilikləri inkişaf üzərində formalaşan şagird-şəxsiyyət yetişdirməkdən, qlobal dəyərlərlə müşaiyət olunan dünya elmi və təhsilinin inteqrasiya prosesində yaxından iştirak etməkdən, Azərbaycanın müstəqilliyi və inkişafı naminə çalışan vətəndaşlar tərbiyələndirməkdən ibarətdir”.
Z.Məmmədova Qərb Universitetinin yüzdən artıq məzununun ölkədə və xaricdə-Rusiya, Hollandiya, İtaliyada rəhbər vəzifələrdə, yüksək postlarda çalışdığını bildirib: “Qərb Universitetini bitirən mütəxəssislərin əksəriyyəti Azərbaycanda və ölkədən kənarda məsul vəzifələrdə çalışır. Məzunlarımız Prezident Aparatında, Xarici İşlər, Daxili İşlər, Fövqəladə Hallar, Rabitə və Yüksək Texnologiyalar, Vergilər, Ekologiya və Təbii Sərvətlər, Nəqliyyat nazirliklərində, Konstitusiya Məhkəməsində, Azərbaycan Prezidenti yanında Strateji Araşdırmalar Mərkəzində, Prezident yanında Vətəndaşlara Xidmət Sosial İnnovasiya üzrə Dövlət Agentliyində, Dövlət Neft Şirkətində, Heydər Əliyev Mərkəzində, Nəqliyyat Departamentində, “Azerenerji Səhmdar Cəmiyyəti”ndə , “SOCAR”, “BP”, “Azercell” şirkətlərində, səfirlik və konsulluqlarda, Bakı şəhər məhkəmələrində, ali və orta məktəblərdə, nüfuzlu banklarda, səviyyəli dizayn qurumlarında, hüquq firmalarında, ölkənin aparıcı televiziya və radio kanallarında yüksək postlar, məsul vəzifələr tutaraq Azərbaycanın rifahı naminə çalışırlar. Qərb Universitetinin fəaliyyətinin əsas göstəricisi məzunlarımızdır. Məzunlarımızla fəxr edirik və xalqımızın, dövlətimizin inkişafı naminə bu ənənənin gələcəkdə də davam etməsi üçün əlimizdən gələni əsirgəməyəcəyik”.
çap et