Bakıda Mərakeşin memarlıq irsinə həsr olunmuş fotosərgi açılıb.
525.az xəbər verir ki, sərgini Mərakeşin Azərbaycandakı səfirliyi Bakı Fotoqrafiya Evi ilə birgə təşkil edib.
Açılış mərasimində çıxış edən Mərakeşin Azərbaycandakı səfiri Adil Embarş “İçərişəhər” Dövlət Tarix-Memarlıq Qoruğu İdarəsinə və Bakı Fotoqrafiya Evinə bu mədəni tədbirə ev sahibliyi etdiyinə görə dərin minnətdarlığını bildirib.
“Yanvarın 11-i ölkəmizin tarixində dönüş nöqtəsinin ildönümüdür, çünki bu tarixdə bir qrup millətsevərin Mərakeşin Fransa müstəmləkəçiliyindən müstəqilliyini rəsmən tələb etməsindən 80 il ötür”, deyən səfir əlavə edib ki, 2024-cü ilin ilk mədəni tədbirinin açılışını etmək Mərakeş səfirliyinə böyük sevinc və qürur bəxş edir.
Diplomat vurğulayıb ki, Mərakeşin hüdudlarından kənarda yayılmış, çoxəsrlik mirasın sübutu olan və xüsusi diqqətlə seçilmiş 90 fotoşəkildən ibarət sərgi altı maraqlı bölmədən ibarətdir: “Liksus, Volubilis və Tamuda kimi şəhərlərlə memarlıq tariximizin əsaslarının qoyulduğu, təxminən 28 əsr əvvəl başlayan antik dövr.
788-ci ildən Mərakeş Milli Dövlətini quran İdrisilərdən tutmuş, Əlahəzrət Kral VI Məhəmmədin başçılıq etdiyi indiki hakim Ələvi sülaləsinə qədər ölkəni idarə edən ardıcıl sülalələr dövrü. Bu sülalələr nəinki Mərakeşin memarlıq simasını formalaşdırdı, həm də Pireney yarımadası və Şimali Afrika boyunca davamlı miraslar qoydular.
Sərgi bizə əsasən Amazıgh bölgələrində Kasbahs və Ksours-un nəfəs kəsən mənzərələrini göstərir. Bu yerlərin bir çoxu YUNESKO-nun Ümumdünya İrsi Obyektləri kimi siyahıya alınıb və Ksar Ait Benhaddou kimi 80-ə yaxın film və seriallarda, məsələn, “Taxt-Tac Oyunları”, “Qladiator”, “Fars Şahzadəsi” və s. kimi əsərlərin çəkildiyi yer olub.
Daha sonra Mərakeşin dövlətçilik rəmzi olan şəhərlərinin bəzi fotoşəkillərini, ölkənin zəngin və rəngarəng tarixinin irsini görəcəksiniz. Hər bir şəhərin qədim mədinələrində özünəməxsus cazibədarlıq və labirint küçələr var. Müasir dövr bir tərəfdən innovasiya və texnologiyanın ahəngdar qarışığı, digər tərəfdən isə materiallar və dizayn baxımından dəyərli irsə dərin bir hörmətdir.
Nəhayət, Mərakeş memarlığının təcəssümü olan bəzi riadların fotoşəkillərini izləyə biləcəksiniz. Burada zənginlik və incəliyin rəqabətini təşkil edən sənətkarlar davamlı yaradıcılıq və yenilik dövrünü stimullaşdırır, hər biri müəyyən edilmiş normalardan kənara çıxaraq öz sənətləri ilə sərhədləri aşmağa çalışır.
Bu 90 fotoşəkil keçmişimizə, bu günümüzə və gələcəyə dair arzularımıza dair bir pəncərədir. Onlar Mərakeşin ruhunu, onun ənənə, innovasiya və sonsuz gözəlliyinin mürəkkəb birləşməsini ümumiləşdirir”.
Səfir onu da deyib ki, sərgi yanvarın 17-dək davam edəcək.
“İçərişəhər” Dövlət Tarix-Memarlıq Qoruğu İdarəsinin İdarə Heyətinin sədri Şahin Seyidzadə bildirib ki, bu sərgi Mərakeşin nadir memarlığını və zəngin mədəni irsini nümayiş etdirir. O bildirib ki, sərgi iki xalqın bir-birini daha yaxşı tanımasına, münasibətlərin inkişafına öz töhfəsini verəcək.
Ş.Seyidzadə əlavə edib ki, son 30 ildə ölkələr arasında əməkdaşlıq bir çox sahələrdə, o cümlədən mədəniyyət, turizm sahəsində inkişaf edib: “Bu sərgiyə ev sahibliyi etməkdən məmnunuq və mədəni əməkdaşlığımızın daha da inkişafı edəcəyinə ümidvarıq”.
Daha sonra fotosərgi ilə tanışlıq olub. Tədbirdə xarici ölkələrin Azərbaycandakı səfirləri, diplomatlar iştirak ediblər.
Pərvanə
çap et