Husilər: ABŞ və Britaniya Hudeyda şəhərini hədəfə alıb

Yəməndəki husilər ABŞ və Britaniya qüvvələrinin ölkənin qərbindəki Hudeyda sahil şəhərinə hava zərbələri endirdiyini bildiriblər.

525.az xarici mediaya istinadən xəbər verir ki, husilərə məxsus “Əl-Masirah” telekanalının xəbərinə görə, ABŞ və Britaniya qüvvələri Hudeydanın Əl-Cubbanə bölgəsinə çoxlu hava zərbələri endirib.

Hudeydanın şimalında, Cubbanə bölgəsində husilərə aid hava hücumundan müdafiə kompleksi var.

Husilərə bağlı olan Hudeydə valisi Məhəmməd Kahim "X" hesabında verdiyi açıqlamada: "sözügedən bombardmanların işğal edilmiş Fələstin xalqına dəstək verməyə münasibətini dəyişməyəcək", - deyib.

ABŞ Mərkəzi Komandanlığının (CENTCOM) bu səhər verdiyi açıqlamada, Yəməndə İranın dəstəklədiyi husilərin gəmi əleyhinə ballistik raket və İran istehsalı olan 3 pilotsuz uçuş aparatı (PUA) ilə Ədən körfəzinə hücum etdiyi bildirib.

Malik Atilay