Ramiz ORSƏR
Ürəkdə sevgilər
Yatmağa tələsmir Ay da bu gecə,
Hava da ətrinə yovşan qatıbdı.
Mənimlə yol gələn sevgim gizlicə
Gecənin köksünə kəmənd atıbdı.
Bu həsrət qızışıb nədən söz açır?
Əlindən iş gəlmir, küydən savayı.
Gecənin gözündən yuxusu qaçır,
Suçlayır çiçəyi, gülü havayı.
Hər görüş, hər baxış savab, qənimət,
Şirin arzuların gözü, könlü tox.
Ürəkdə sevgilər gurtlayır, fəqət
Halalına haram qatan halı yox.
Yatmağa tələsmir Ay da bu gecə,
Hava da ətrinə yovşan qatıbdı.
Mənimlə yol gələn sevgim gizlicə
Gecənin köksünə kəmənd atıbdı...
...İş başında
Sükut çapır atını,
İçi yanır yaşın da.
Eşir qazan altını
Həsrətlər iş başında...
Yuxu yatmır tək səbir,
Nalbəndi yox atların.
Çiçəkləmir boş qəbir,
Rəngi solur otların.
Bayatı da ovutmur
Ovcunda nəm havanın.
Ayaqları yer tutmur
Qurtarsa da davanın.
Sükut çapır atını,
Gözü yaşdı daşın da.
Eşir qazan altını
Həsrətlər iş başında...
Bu torpağın
Hər sevincin öz işığı, öz şamı,
Bu torpağın yoxdur qədir-qiyməti.
Ay-ulduzlar gecələrin, axşamın,
Alın təri bu torpağın sərvəti...
Çal-çağırlar mat eyləmir tək məni,
Yolçuların əllərində tər çiçək
Dil biləndi bənövşəsi, süsəni,
Bu yerlərə bir də qayıdam gərək.
Buludunun sovqatı da bir inci,
Qurda-quşa sıxınacaq - meşələr.
Səhər şehi kol-kosların muncuğu,
Göz yaşıtək dumdurudu çeşmələr.
Can dərmanı - yemlikotu, qulançar,
Günəş gülür gözlərində güllərin.
Burda haqqa çatmaq olar - bir şərt var:
Halallıqdan üzülməsin əllərin.
Hər sevincin öz işığı, öz şamı,
Bu torpağın yoxdur qədir-qiyməti.
Ay-ulduzlar gecələrin, axşamın,
Alın təri bu torpağın sərvəti...
Təkliyin
Kirpiklərdən üzülər,
muncuq-muncuq düzülər,
bükülüb dərdlərinə
öz içinə süzülər
təkliyin.
Susayan yarpaqlar
budağından düşər,
əsən külək taqətdən.
İt itliyindən bezməz,
köləlik itaətdən.
Təkliyin içində
təklik özü təkləyir təki,
Haqqa sığınan təkin
kürəyində təkin əli,
təki!..
Sevənlərə...
Sevənlərə yaşın-zadın fərqi nə?
Yaşda deyil, vallah, ağıl başdadı.
Çönüb baxmır həsrət, vüsal fərqinə
Leyli, Məcnun hələ sevən yaşdadı.
Külək olub yaşamadım həyatda,
Əylənməyə künc-bucaq da gəzmədim.
Keçməsə də günüm kefdə, büsatda
Məhəbbətin duz yükündən bezmədim.
Şirin ağız, yumşaq damaq, haqq dadı
Sevgi, sevinc bir ömürün zinəti.
Leylilərin, Məcnunların haqqıdı,
Sevə-sevə qocalmağın ləzzəti.
Nə can qalır, nə canda bir heyimiz,
Araz axır dibi dolu lililən.
Heç sahilə çıxartmayır beynimiz,
Varmı eşqi Füzulidən baş bilən?!
Bir ömürçün yaşın-zadın fərqi nə?
Yaşda deyil, billah, ağıl başdadı.
Sevən varmır heç vaxt yaşın fərqinə,
Leyli, Məcnun yenə həmən yaşdadı.
çap et