525.Az
Nyu-Yorkda “Azərbaycan Evi” fəaliyyətə başladı
Amerika Birləşmiş Ştatlarının Nyu-York şəhərinin Bruklin səmtində “Azərbaycan Evi”nin (“Azerbaijan House”) açılışı olub.
Lent.az-ın Diasporla İş üzrə Dövlət Komitəsinin mətbuat xidmətinə istinadən verdiyi xəbərə görə, Azərbaycan-Amerika Qadınlar Assosiasiyasının rəhbəri Münəvvər Vahabovanın rəhbəri olduğu “Azərbaycan Evi”nin açılış mərasimində Azərbaycanın ABŞ-dakı səfirliyinin nümayəndələri Emil Səfərov, Vüsalə Muradəliyeva, Azərbaycanın BMT yanında daimi nümayəndəliyinin təmsilçisi Fərid Cəbrayılov iştirak edib.
Nyu-Yorkdakı Azərbaycan, türk və yəhudi cəmiyyətlərinin təmsilçiləri də mərasimə qatılıb.
Açılış mərasimində çıxış edən M.Vahabova “Azərbaycan Evi”ni azərbaycanlıların, eləcə də digər türkdilli xalqların toplaşacağı mədəniyyət mərkəzinə çevirmək niyyətində olduğunu bildirib:
“Bizim məqsədimiz Nyu-Yorkda, əsasən də Bruklində yaşayan azərbaycanlılar, digər türkdilli icmaların nümayəndələri, həmçinin Azərbaycan yəhudiləri arasında əlaqələrin möhkəmlənməsini təmin etmək, onların vətən həsrətini paylaşması üçün şərait yaratmaq, eləcə də milli adət-ənənələrimizi yaşatmaqdır”.
08.10.2014 
çap et