“731-ci dəstə”nin üzvü müharibə cinayətlərini ifşa etmək üçün Çinə gəlib

İkinci Dünya müharibəsi zamanı bioloji silahları tədqiq və inkişaf etdirən Yaponiyanın məşhur “731-ci dəstə”sinin gənclər korpusunun keçmiş üzvü Hideo Şimizu Çinin Heilongjiang əyalətinin şimal-şərqindəki Harbin şəhərinə gəlib.

525.az “Sinxua” agentliyinə istinadən xəbər verir ki, o, sübutlar təqdim etmək və Yaponiyanın Çinə hərbi müdaxiləsi zamanı bölmənin törətdiyi cinayətləri ifşa etmək niyyətindədir.

Kvantunq Ordusunun “731-ci dəstəsi”nin cinayətlərinin sübutları olan muzeyə və bu bölmənin yerləşdiyi keçmiş əraziyə baş çəkməyi planlaşdıran 94 yaşlı Hideo Şimizu Yaponiyanın Harbinə göndərdiyi dəstənin gənclər korpusunun sonuncu qrupu arasında olub. Orada dörd aydan çox qalıb və  insanlar üzərində aparılan bir sıra təcrüblərə, o cümlədən insan viviseksiyasına, patogen mikroorqanizmlərin yetişdirilməsi kimi hərbi cinayətlərə şahidlik edib. 14 avqust 1945-ci ildə geri çəkilən yapon qoşunları ilə birlikdə Çindən qaçıb.

2016-cı ildə Hideo Şimizu “731-ci dəstə”nin keçmiş üzvü olduğunu açıqlayıb və tarixi həqiqətləri çatdırmaq üçün ictimai çıxışlarında, müsahibələrində Kvantunq Ordusunun vəhşiliklərindən danışmağa başlayıb.

Bu səfər onun 79 ildən sonra Çin torpağına ilk qayıdışıdır. Əvvəllər o, qurbanlar üçün dua etmək və yaxınlarından üzr istəmək üçün Çinə qayıtmaq arzusunu dəfələrlə bildirib.  Səfər Yaponiyadakı müxtəlif vətəndaş qruplarının ianələri hesabına mümkün olub.

“Müharibə 79 il əvvəl başa çatdı və “731-ci dəstə”nin üzvlərinin əksəriyyəti artıq ölüb. Çox güman ki, o, həm də Harbinə qayıdan və cinayətlərini ictimaiyyət qarşısında ifşa etməyə hazır olan dəstənin yeganə sağ qalan üzvü olacaq”, - “731-ci dəstə”nin  cinayətlərinin sübutları Muzeyinin direktoru Jin Çenqmin bildirib.

Bu dəstə Harbində bioloji və kimyəvi silahların inkişafı üçün çox məxfi tədqiqat bazası kimi yaradılmış və İkinci Dünya müharibəsi zamanı Yaponiyanın Çin və Cənub-Şərqi Asiyada bioloji müharibəsinin aparıcı mərkəzi olub. Ən azı 3 min insan bu qrupun apardığı təcrübələrə məruz qalıb, Çində isə 300 mindən çox insan Yaponiyanın bioloji silahlarının qurbanı oldu.

Pərvanə Sultanova