Bu il keçirilən Çin-Afrika Əməkdaşlıq Forumu (FOCAC) sammiti Çin və Afrika üçün praqmatik və effektiv əməkdaşlığa nail olmaq üçün mühüm platforma təqdim edir.
525.az xəbər verir ki, bu barədə “Sinxua” agentliyinə Sudanın energetika və neft naziri Mohieddin Naim Mohamed Said bildirib.
O deyib ki, forum bir sıra irimiqyaslı əsas infrastruktur layihələrinin həyata keçirilməsi yolu ilə Afrika və Çində investisiyaların, ticarətin və insanlar arasında əlaqələrin təşviqində mühüm rol oynayıb.
Nazirin sözlərinə görə, sammit vasitəsilə Afrika və Çin liderləri dostluğu bərpa edəcək, gələcək əməkdaşlıq məsələlərinə diqqət yetirəcəklər ki, bu, təkcə Afrika və Çin xalqlarının istəyi deyil, həm də mövcud vəziyyət, yeni dövr və dəyişən şərtlər fonunda praktiki zərurətdir.
Sudan və Çin arasındakı münasibətləri “Cənub-Cənub əməkdaşlığı modeli” kimi xarakterizə edən nazir, ümidvar olduğunu bildirib ki, sammit ikitərəfli ticarəti və ənənəvi sektorlara, o cümlədən infrastruktur və kənd təsərrüfatına investisiyaları artırmağa kömək edəcək.
Sudanlı rəsmiyə görə, iki tərəf arasında əməkdaşlıq tədricən təmiz enerji və yaşıl iqtisadiyyat kimi yeni sahələrdə genişlənəcək və bu, Afrika və Çinin birgə inkişafına güclü təkan verəcək, həmçinin iki ölkə arasında davamlı dostluq üçün yeni perspektivlər açacaq.
O bildirib ki, Sudan FCAC, Çin-Ərəb Əməkdaşlıq Forumu və “Bir kəmər, bir yol” təşəbbüsü vasitəsilə müxtəlif sahələrdə Çinlə praktiki əməkdaşlığı dərinləşdirməyə hazırdır.
Qeyd edək ki, FOCAC sammiti sentyabrın 4-dən 6-dək Pekində keçirilir.
Pərvanə Sultanova
çap et