İlon Mask məhkəmədə tviterin keçmiş əməkdaşına uduzdu

Amerikalı sahibkar İlon Mask məhkəmədə tviter (hazırkı adı “X”) sosial şəbəkəsinin keçmiş əməkdaşına uduzub.

525.az “Bloomberg”ə istinadən xəbər verir ki, adı açıqlanmayan şəxs Maskdan 2022-ci ildə şirkətdə kütləvi ixtisarlardan sonra ona təzminat ödənilməsini istəyirdi.

Məhkəmənin qərarına əsasən, şikayətçi şəxs tam işdən çıxma paketi üzrə təzminat alacaq.

Vəkil Şennon Liss-Riordan bildirib ki, məhkəmənin qərarı oxşar şikayətlərlə bağlı hallarda yekun qərara təsir göstərə bilər. Belə ki, hazırda təzminatla bağlı daha 15 iş arbitraj dinləməsindən keçib.

Xatırladaq ki, 2022-ci ilin oktyabrında Mask 44 milyard dollara tviterin səhmlərinə sahib çıxıb. Alışdan sonra o, şirkətdə kütləvi şəkildə ixtisar aparıb. Buna qədər 7,5 min əməkdaşı olan sosial şəbəkədə işçi sayı 2 minə endirilib. 2023-cü ildə isə şirkətin adı “X”a dəyişdirilib.

İbrahim Cəfərov