Qırğız Respublikasının "Slovo Kırqızstana" Dövlət qəzetində Azərbaycan Respublikasının Qırğız Respublikasında Səfirliyinin dəstəyi ilə bu ilin oktyabr ayının 15-də Qırğız Respublikasının Abdılas Maldıbayev adına Milli Akademik Opera və Balet Teatrında keçirilmiş Azərbaycan musiqisi günü ilə bağlı geniş məqalə dərc olunub.
"Arşın mal alan"ı oynayırıq və ya azərbaycanca - "Cənnət" adlanan məqalədə Azərbaycan Respublikasının Qırğız Respublikasında Fövqəladə və Səlahiyyətli səfiri Hidayət Orucovun tədbirdəki ətraflı çıxışını tam olaraq qəzet oxucularına təqdim edərək, oxuculara "Arşın mal alan" operettası və onun zəngin tarixi ilə yaxından tanış olma imkanı verib.
Səfir çıxışında qeyd edib ki, Azərbaycan ilə Qırğızıstan arasında əməkdaşlıq münasibətləri təkcə siyasi və iqtisadi sahədə deyil, həm də humanitar sahədə inkişaf etməkdədir və bu xətt Azərbaycan Respublikasının Prezidenti Zati-Aliləri cənab İlham Əliyevin və Qırğız Respublikasının Prezidenti Zati-Aliləri cənab Almazbek Atambayevin siyasətinin prioritet istiqamətlərindəndir: "Son zamanlarda həm Azərbaycanda, həm də Qırğızıstanda bir çox maraqlı humanitar birgə tədbirlər keçirilməkdədir. Belə tədbirlərin təşkil olunması qardaş xalqları daha da yaxınlaşdırır. Bu axşam baxacağımız "Arşın mal alan" operettası həm yaşlı, həm də cavan nəsil arasında çox sevilir, çünki o bütün nəsillər üçün yaranmış unudulmaz bir incidir. 101 il bundan əvvəl - 1903-cü ildə hələ Peterburq konservatoriyasının tələbəsi olarkən Üzeyir Hacıbəyov "Arşın mal alan " operettasını yazıb və elə həmin ildə də bu operetta Bakıda Zeynalabdin Tağıyev adına teatrda səhnəyə qoyulub. Bu əsər 76 ölkənin 187 teatrında nümayiş olunub. Onun əsasında hələ 1945-ci ildə çəkilmiş film isə 136 ölkədə göstərilib.
Bütün müsəlman şərqində Üzeyir Hacıbəyov ilk operanın, operettanın, musiqili komediyanın və kantat-oratoriya musiqisinin yaradıcısı, ümumilikdə isə Azərbaycan klassik musiqi sənətinin banisidir. 1908-ci ilin 25 yanvarında Azərbaycan milli opera sənətinin ilk nümunəsi kimi tarixə düşən Üzeyir Hacıbəyovun ilk operası "Leyli və Məcnun" səhnələşdirilib".
Səfir, görkəmli Azərbaycan bəstəkarlarının əsərlərini öz repertuarına həmişə daxil etdiyi və bu gün "Arşın mal alan" operettasını tamaşaya hazırladığı üçün Qırğız Respublikasının Abdılas Maldıbayev adına Milli Akademik Opera və Balet Teatrının kollektivinə dərin təşəkkürünü bildirib.
Məqalədə qeyd edilib ki, 3 saat ərzində ağzınacan tamaşaçılarla dolu olan nəhəng salonda hər kəs böyük həvəslə "Arşın mal alanı" izləyib. Tamaşa bitəndə salonda uzun müddət alqış sədaları səslənib.
çap et