BMT Təhlükəsizlik Şurasının qətnamələri BMT Nizamnaməsində nəzərdə tutulduğu kimi, bütün dövlətlər üçün məcburidir və təhrifə, şərhə yol vermir.
525.az xəbər verir ki, bunu Çinin BMT-dəki daimi nümayəndəsi Fu Konq Təhlükəsizlik Şurasının Qəzzada humanitar vəziyyətlə bağlı brifinqində deyib.
Onun sözlərinə görə, ötən ilin oktyabrından Qəzza zolağındakı münaqişə və Yaxın Şərqdəki vəziyyət Təhlükəsizlik Şurasının diqqət mərkəzində olub: “Lakin vəziyyət hələ də yaxşılaşmayıb, əksinə, pisləşməkdə davam edir".
Diplomat vurğulayıb ki, Təhlükəsizlik Şurasının marginallaşmasına göz yuma bilmərik: “BMT Təhlükəsizlik Şurası üzvlərinin böyük əksəriyyəti arasında Fələstin-İsrail məsələsində geniş konsensus var. Şuranın hərbi əməliyyatların dərhal dayandırılması tələbinə dəfələrlə veto qoyduqdan sonra Birləşmiş Ştatlar may ayında öz atəşkəs təşəbbüsünü irəli sürüb, İsrailin bunu qəbul etdiyini bəyan edib və Təhlükəsizlik Şurasından diplomatik danışıqlar yolu ilə razılığın əldə olunmasına dəstək verməsini istəyib. Lakin, son beş ay ərzində, deyəsən, diplomatik səylər yoxa çıxıb, gözləmə və səbir daha çox mülki itkilərə və daha da ehtiyatsız hərbi avantürizmə gətirib çıxardı”.
Fu Konqun fikrincə, indiki çıxılmaz vəziyyəti dərindən araşdırmaq və bəzi özünəməxsus prinsipləri bir daha təsdiqləmək lazımdır: “Təhlükəsizlik Şurasının qətnamələri BMT Nizamnaməsində nəzərdə tutulduğu kimi, bütün dövlətlər üçün məcburidir. Bununla əlaqədar olaraq, beynəlxalq humanitar hüququn tətbiqi müzakirə edilə bilməyən və sövdələşmə vasitəsi kimi istifadə edilə bilməyən bir öhdəlikdir. Beynəlxalq hüququn prinsipləri bütün dövlətlər üçün universal olaraq tətbiq edilə bilər. İkili standartlar və seçici yanaşma tətbiqi geniş yayılmış mənfi nəticələri olan dəhşətli presedent yaradacaq. Biz, əlbəttə ki, əsl diplomatiyaya inamımızı itirə bilmərik".
Diplomat aidiyyəti ölkəni insanların həyatlarının xilasına üstünlük verməyə, siyasi iradə nümayiş etdirməyə, qərəzsiz mövqe tutmağa, siyasi hesablamalardan əl çəkməyə və aidiyyəti tərəfə hər cür təsir göstərməyə çağırıb: "Eyni zamanda, biz Təhlükəsizlik Şurasının müharibəni dayandırmaq və sülhü tez bir zamanda bərpa etmək üçün əlavə tədbirlər görmək üçün öz arsenalında mövcud olan bütün vasitələrdən istifadə etməsini dəstəkləyirik".
Pərvanə Sultanova
çap et