525.Az
Abel Məhərrəmov "525"i təbrik etdi
“525-ci qəzet”in baş redaktoru, cənab Rəşad MƏCİDƏ
Hörmətli Rəşad müəllim!
“525-ci qəzet”in 20 illik yubileyi münasibətilə Sizi və bütün redaksiya heyətini öz adımdan və Bakı Dövlət Universitetinin çoxminli professor-müəllim, tələbə heyəti adından ürəkdən təbrik edirəm!
Azərbaycan mətbuatı tarixində öz yeri, dəsti-xətti və xüsusi çəkisi olan “525-ci qəzet” 20 illik fəaliyyəti dövründə çox şərəfli bir yol keçmiş, respublikamızın ictimai-siyasi, mədəni və sosial həyatını geniş oxucu auditoriyası üçün obyektiv işıqlandırmış, təhsil və mədəniyyət işçilərinin, elm xadimlərinin sevimli mətbuat orqanına və onların səsini ictimaiyyətə çatdıran tribunaya çevrilmişdir. Bu qəzet Azərbaycanın siyasi, iqtisadi, mədəni həyatında baş verən hadisələri dolğun işıqlandırması, dövlətimizin apardığı uğurlu daxili və xarici siyasəti obyektiv qiymətləndirib xalqa düzgün çatdırması, dərin analitik yazıları, sanballı araşdırmaları ilə fərqlənmiş, xalqın sevimlisinə çevrilmişdir.
Rəngarəngliyi, aktual mövzuları ilə oxucuların dərin sevgisini qazanan “525-ci qəzet” mətbu sözün məsuliyyətini dərindən dərk edən və jurnalistikanın şərəfli ənənələrini yaşadan qəzet kimi davamlı olaraq milli-mənəvi dəyərlərimizin qorunub saxlanmasında, inkişaf etdirilməsində əvəzsiz xidmətlər göstərmişdir.
Hörmətli Rəşad müəllim!
Biz çox məmnunuq ki, Bakı Dövlət Universiteti ilə rəhbərlik etdiyiniz qəzet arasında olduqca məhsuldar əlaqələr qurulmuşdur. Universitet həyatı ilə bağlı obyektiv, dolğun və davamlı məlumatlar yayımladığınıza, burada çalışan böyük ziyalıların respublika ictimaiyyətinə daha yaxından tanıtdırılması, elmin və təhsilin inkişafına göstərdiyiniz xüsusi qayğıya görə “Universitetin dostu” mükafatına layiq görülmüşsünüz. Siz Universitetin məzunu olduğunuzu heç vaxt unutmamış, hər zaman yüksək ziyalılıq, peşəkarlıq, professionalizm və obyektivlik nümayiş etdirərək bu adı şərəflə doğrultmuşsunuz.
Mən bir daha bu gözəl gün – 20 illik yubileyiniz münasibətilə Sizi və bütün redaksiya heyətini təbrik edir, Azərbaycan xalqının intellektual səviyyəsinin bir qədər də yüksəlməsi, mətbu sözün daha da inkişafı, ölkəmizin çiçəklənməsi, dövlətçiliyimizin daha da möhkəmlənməsi naminə uğurlar arzulayıram. İnanıram ki, milli mətbuat tariximizdə nüfuzunuzu qorumaq üçün bundan sonra da əlinizdən gələni əsirgəməyəcəksiniz.
Hörmətlə,
BDU-nun rektoru, akademik Abel Məhərrəmov
16.11.2012 çap et