Harrisin siyasətdə gələcəyi yoxdur - Politoloq

Demokratların ABŞ prezidentliyə namizədi Kamala Harrisin siyasətdə gələcəyi və respublikaçı rəqibi Donald Trampın qələbəsinə etiraz etmək üçün heç bir şansı yoxdur.

525.az xəbər verir ki, bunu rusiyalı politoloq Pavel Feldman deyib.

“Aydındır ki, Harrisin siyasətdə gələcəyi yoxdur. Bir neçə aydan sonra heç kim onun varlığını xatırlamayacaq. Təsəlliverici mükafat Harvardda dərs demək və təqaüdə çıxanda xatirələr yazmaq imkanı olacaq”, - Feldman əlavə edib.

Onun sözlərinə görə, əvvəllər ABŞ-da demokratiyanın əsas tələblərindən birinə əməl olunurdu: uduzan prezidentliyə namizəd açıq şəkildə öz məğlubiyyətini etiraf edir, bəzən isə qalibi təbrik edirdi. Bununla belə, Harris heç vaxt Trampın qələbəsi ilə barışmayacaq. Eyni zamanda, onun seçkinin nəticələrinə etiraz etmək şansı yoxdur.

Feldman söyləyib ki, Trampı səsvermənin nəticələrini saxtalaşdırmaqda ittiham etmək olmaz, çünki seçkilər zamanı onun inzibati resursları yox idi: “İndi respublikaçıların ixtiyarında təkcə Ağ ev deyil, həm də Konqres var. Demokratlar tamamilə siyasi müflis olurlar. Onların sıralarındakı müxtəlif ideoloji fraksiyaların tərəfdarları arasında liderlik uğrunda ümidsiz mübarizə başlayacaq”.

Onun sözlərinə görə, respublikaçıların Konqresdəki çoxluğdan istifadə edərək hazırkı prezident Co Baydenin “açıq-aşkar səriştəsizliyinə” görə impiçmentinə cəhd etməsi tamamilə mümkündür. Ekspert hesab edir ki, gələn ildən etibarən ABŞ-a tamamilə fərqli ideologiyanı rəhbər tutan yeni komanda rəhbərlik edəcək: “ABŞ-ın siyasi tarixində Baydenin dörd illik hakimiyyəti ilə bağlı ən biabırçı səhifə açılıb. Bu, şübhəsiz ki, daha da pisləşməyəcək, çünki Vaşinqtonun daha aşağı enəcək yeri yoxdur”.

Pərvanə Sultanova