Yanvarın 17-də Milli Kitabxananın nəzdində fəaliyyət göstərən "Açıq kitabxana" - sərbəst mütaliə bölməsində 20 Yanvar - Ümumxalq Hüzn Gününə həsr olunmuş tədbir keçirilib.
525.az xəbər verir ki, tədbirdə K.Kərimov adına 8 saylı tam orta məktəbin 6a sinif şagirdləri iştirak ediblər. Öncə 20 Yanvar faciəsi qurbanlarının xatirəsi bir dəqiqəlik sükutla yad edilib.
“Açıq kitabxana" - sərbəst mütaliə bölməsinin müdiri Lalə Salahova Azərbaycan tarixinin qəhrəmanlıq səhifəsi olan 20 Yanvar faciəsindən artıq 35 il ötdüyünü, həmin gün Azərbaycan xalqının milli azadlıq uğrunda mübarizə əzminin heç bir qüvvə tərəfindən qıra bilinməyəcəyini nümayiş etdirdiyini bildirib.
Tədbirin davamında məktəbin məktəbdən kənar, sinifdənxaric işlər üzrə təşkilatçısı Safura İbrahimli faciə haqqında xatirələrini tədbir iştirakçıları ilə bölüşüb. O qeyd edib ki, 20 Yanvar Azərbaycan xalqının tarixində təkcə hüznlə xatırlanacaq gün deyil, həm də millətimizin qəhrəmanlığını nümayiş etdirməyi bacardığı gündür. Daha sonra məktəblilər 20 Yanvar hadisəsindən bəhs edən kitablar və fotoşəkillərlə tanış olub, sinfin şagirdi Jasmin Allahverdiyeva şeir səsləndirib.
Sonda xatirə şəkilləri çəkilib.
çap et