"Azərbaycanla palma yağı ticarətini genişləndirməyi səbirsizliklə gözləyirik" - Səfir

"2024-cü ildə Azərbaycanın palma yağı idxalı 82.2 milyon ABŞ dolları təşkil edib. Bu idxalın 36.4 faizi (29.9 milyon ABŞ dolları) Malayziyanın payına düşür və Malayziyanı Azərbaycanın palma yağı üzrə ikinci ən böyük təchizatçısı mövqeyinə gətirib".

525.az xəbər verir ki, bunu Malayziyanın Azərbaycandakı səfiri Əhməd Kamrizamil Bin Mohd Rza deyib.

Onun sözlərinə görə, 2024-cü ildə Malayziyanın qlobal palma yağı ixracı 29 milyard ABŞ dolları olub.

Ən böyük idxalçılar arasında Çin, Avropa İttifaqı, Türkiyə və Azərbaycan kimi inkişaf etməkdə olan bazarlar yer alır: "Azərbaycanın modifikasiya olunmuş yağlar və marqarin məhsulları üzrə idxal potensialı hələ tam istifadə olunmayıb. Bu sahədə Malayziya qlobal miqyasda müvafiq olaraq 1.74 milyard ABŞ dolları və 581 milyon ABŞ dolları dəyərində ixrac həyata keçirib. Bu səbəbdən, Malayziya və Azərbaycan arasında palma yağı ticarətini daha da genişləndirməyi səbirsizliklə gözləyirik".

Diplomat əlavə edib ki, Malayziya Palma Yağı Şurası (MPOC) Malayziya palma yağının üstünlüklərini beynəlxalq miqyasda təşviq edən əsas qurumdur: "Təşkilat palma yağının məmulatların teksturasını, dayanıqlığını və saxlama müddətini qoruyub saxlamaq qabiliyyəti kimi unikal texnoloji xüsusiyyətlərini ön plana çıxarır, xüsusilə şirniyyat və tez hazırlanmış qida məhsulları sahəsində. Malayziyanın palma yağı ekosistemi 2015-ci ildən etibarən dayanıqlı şəkildə fəaliyyət göstərir. Malayziya Dayanıqlı Palma Yağı Sertifikatı (MSPO) ilə təmin olunur və palma ağaclarının əkilməsindən tutmuş bu dəyərli mayenin istehsalına qədər bütün mərhələləri əhatə edir. Biz inanırıq ki, Malayziya palma yağı, şaxələndirilmiş və dayanıqlı təchizat zəncirləri vasitəsilə Azərbaycanın qida təchizatını dəstəkləyə bilər. Azərbaycan dayanıqlı ekosistemin təşviqində aparıcı mövqe tutur. Xüsusilə yaşıl texnologiyalar, dayanıqlı məhsullar və bərpa olunan enerji ilə bağlı təşəbbüsləri fəal şəkildə irəli sürür. Bu məsələlər Azərbaycanın COP29-a sədrliyi zamanı da ön plana çıxarılıb. Bu baxımdan, biz Malayziya palma yağının Azərbaycan bazarına çıxışının asanlaşacağına inanırıq".

Pərvanə Sultanova