ABŞ Prezidenti Donald Trampın administrasiyası 6000 nəfərdən çox tələbənin vizasını ölkədə qalma müddətinin aşılması və qanun pozuntuları səbəbindən ləğv edib.
525.az “Reuters”ə istinadən xəbər verir ki, ABŞ Dövlət Departamentinin sözçüsünün verdiyi məlumata görə, vizaların ləğvi Tramp administrasiyasının immiqrasiya siyasəti çərçivəsində tələbə vizalarına qarşı sərtləşdirilmiş tədbirlərin bir hissəsidir. Sosial media hesablarına daha dərin nəzarət və viza müraciətlərinə qarşı sərt yoxlamalar tətbiq olunub.
2025-ci ildə qəbul edilmiş Dövlət Departamenti təlimatlarına əsasən, ABŞ diplomatları ölkəyə qarşı düşmən münasibəti ola biləcək və siyasi aktivliyi ilə seçilən viza müraciətçilərinə qarşı daha diqqətli olmalıdırlar.
İbrahim Cəfərov
Rəsmilərin bildirdiyinə görə, təxminən 4000 viza qanun pozuntularına görə ləğv edilib. Bu halların əksəriyyəti hücumlarla əlaqədar olub. Digər səbəblərə isə sərxoş və ya narkotik maddə təsiri altında avtomobil idarəetməsi, eləcə də oğurluq kimi cinayətlər daxildir.
Təxminən 200-300 vizanın ləğvi terror fəaliyyəti ilə bağlı olub. Dövlət Departamentinin Xarici İşlər üzrə Rəhbərliyinə əsasən, vizanın verilməsindən imtina üçün əsaslar sırasında “terrorçuluq fəaliyyətində iştirak” və “terrorçu təşkilatlarla əlaqələrin mövcudluğu” qeyd olunur. Lakin vizaları ləğv olunan tələbələrin hansı qrupları dəstəklədiyi açıqlanmayıb.
Prezident Tramp bir sıra nüfuzlu ABŞ universitetlərini antisemitizmin yayılmasına şərait yaratmaqda ittiham edərək, onların Fələstin hüquqlarını müdafiə edən tələbə aksiyalarına qarşı lazımi tədbir görmədiyini bildirib. Xüsusilə Harvard Universiteti ilə yaşanan qarşıdurmada Tramp elmi tədqiqatlara ayrılan vəsaiti dondurub və universiteti vergi güzəştlərindən məhrum etməklə hədələyib. Bu hadisələr Avropada bəzi ölkələrin istedadlı mütəxəssisləri cəlb etmək üçün tədqiqat qrantlarını artırmalarına səbəb olub.
ABŞ Dövlət katibi Marko Rubio qeyd edib ki, yüzlərlə, bəlkə də minlərlə şəxsin, o cümlədən tələbələrin vizaları ləğv olunub. Səbəb kimi onların ABŞ-ın xarici siyasət prioritetlərinə zidd fəaliyyətlə məşğul olmaları göstərilib.
Tramp administrasiyasının rəsmiləri bildiriblər ki, tələbə vizası və daimi yaşayış icazəsi (yaşıl kart) sahibləri Fələstini dəstəklədiklərinə və İsrailin Qəzza müharibəsindəki hərəkətlərini tənqid etdiklərinə görə deportasiya oluna bilərlər. Onlar bu fəaliyyətləri ABŞ-ın xarici siyasətinə təhlükə və HƏMAS-ı dəstəkləmə kimi qiymətləndiriblər.
Tafts Universitetinin Türkiyədən olan tələbəsi İsrailin Qəzza zolağındakı hərbi əməliyyatlarına dair universitetin mövqeyini tənqid edən məqaləyə həmmüəlliflik etdiyi üçün Luizianadakı immiqrasiya saxlanma mərkəzində altı həftədən çox müddətə saxlanılıb. Daha sonra federal hakimin qərarı ilə girov qarşılığında azad edilib.
Trampın tənqidçiləri bu cür tədbirləri ABŞ Konstitusiyasının Birinci Düzəlişi ilə qorunan söz azadlığına qarşı açıq hücum kimi dəyərləndirirlər.
çap et