3 sentyabrda Pekində Çin tarixinin ən böyük hərbi paradı keçirilib.
525.az “Reuters”ə istinadən xəbər verir ki, Rusiya prezidenti Vladimir Putin və Şimali Koreya lideri Kim Çen Inın da iştirak etdiyi paradı Qərb ölkələrinin liderləri boykot ediblər.
Parad, II Dünya müharibəsinin sonunda Yaponiyanın məğlubiyyətinin 80-ci ildönümünə həsr olunub və Çinin artan hərbi gücünün nümayişi məqsədi daşıyıb.
Si Cinpin çıxışında bildirib ki, “bəşəriyyət sülh və müharibə, dialoq və qarşıdurma arasında seçim qarşısındadır” və Çin tarixin doğru tərəfində dayanır. O, açıq limuzinlə hərbi qüvvələrin qarşısından keçərək hipersəs raketləri, pilotsuz sualtı aparatları və silahlı “robot-canavar” kimi yeni texnologiyaları nümayiş etdirib. Tədbir 70 dəqiqə davam edib və yekun olaraq 80.000 kağız “sülh quşu” buraxılıb.
Parad ABŞ-la artan gərginlik fonunda keçirilib. Si Cinpin daha əvvəl hegemonluğa və güc siyasətinə qarşı birgə mübarizəyə çağırış etmişdi. ABŞ-ın prezidenti Donald Tramp parad zamanı sosial şəbəkədə paylaşım edərək, Putin və Kimi ABŞ-a qarşı sui-qəsd qurmaqda ittiham edib. Tayvan isə tədbiri sərt tənqid edərək, öz vətəndaşlarını parada qatılmamağa çağırıb və Çin tərəfinin ərazi iddialarına qarşı xəbərdarlıq edib.
Putin və Kim Çində fəxri qonaq kimi qarşılanıblar. Müşahidəçilər bu görüşü Rusiya və Şimali Koreya arasında iyunda imzalanmış təhlükəsizlik müqaviləsindən sonra Pekin ilə Pxenyan arasında yeni ittifaqın başlanğıcı kimi qiymətləndirirlər. Qeyd olunur ki, Kim Çen In 66 ildən sonra ilk dəfə Çin hərbi paradında iştirak edib. Son iki ildə Çin ordusundan onlarla general korrupsiyaya görə uzaqlaşdırılıb. Analitiklər paradın həm də daxili islahatların üstünü örtmək və vətənpərvərliyi gücləndirmək məqsədi daşıdığını bildirirlər. Si Cinpin çıxışında Çin millətinin dirçəlişini “dayandırıla bilməz” adlandırıb.
Bu parad Çin rəhbərliyinin qlobal güc ambisiyalarını nümayiş etdirməsi kimi qiymətləndirilir. Putin və Kimin iştirakı isə Asiya-Sakit okean regionunda yeni siyasi və hərbi ittifaqlara yol aça bilər.
“525”
çap et