Türkiyə Prezidenti Rəcəb Tayyib Ərdoğan Nyu-Yorkda Birləşmiş Millətlər Təşkilatının (BMT) 80-ci Baş Assambleyasında çıxış edib.
525.az xəbər verir ki, Ərdoğan Türkiyə vətəndaşları ilə birlikdə səsi susdurulan Fələstin xalqının adından çıxış etdiyini bildirib:
“Fələstin Dövlətini tanıdığını bəyan edən bütün ölkələrə təşəkkür edirik. Biz bu qərarı hələ qəbul etməyən dövlətləri təcili tədbirlər görməyə çağırırıq. Birləşmiş Millətlər Təşkilatının Nizamnaməsi 80 il əvvəl San-Fransiskoda imzalanmış və 1945-ci il oktyabrın 24-də qüvvəyə minmişdir. Mən burada Birləşmiş Millətlər Təşkilatının Nizamnaməsinin birinci maddəsinin ilk sözlərini xatırlatmaq istərdim: Birləşmiş Millətlər Təşkilatının məqsədi beynəlxalq sülh və təhlükəsizliyi qorumaqdır. Bəli, biz bu zalda Birləşmiş Millətlər Təşkilatının 80 illik yubileyini qeyd edərkən, dünyanın bir çox yerlərində onun Nizamnaməsinin birinci maddəsinin ilk sözünə kölgə salacaq ağır hadisələr cərəyan edir. Xüsusilə Qəzzada 700 gündən artıqdır ki, gözümüzün önündə soyqırım davam edir”, - deyə Türkiyə Prezidenti bildirib.
Ərdoğan qeyd edib ki, Qəzzada dinc əhali qətlə yetirilir: “Qəzzada öldürülən dinc əhalinin sayı 65 mini keçib. Dağıntılar altında nə qədər cəsədin basdırıldığı hələlik məlum deyil. Ölənlərin 20 mindən çoxu uşaqlardır. Son 23 ay ərzində İsrail tərəfindən hər saat Qəzzadan bir uşaq vəhşicəsinə qaçırılır. Bunlar rəqəmlər deyil, dostlar. Hər biri bir candır, günahsız insandır. İnsanlar təkcə silahla deyil, aclıq ilə də öldürülür. 21-ci əsrdə sivil dünyanın nəzərləri altında 146 uşaq, 428 nəfər aclıqdan ölüb və onların sayı hər gün artır”.
Daha sonra Türkiyə lideri Qəzzada gündəlik həyatı əks etdirən bir fotoşəkil göstərib: “Göründüyü kimi, birinci fotoda əllərində hövzə tutan qadınlar əks olunub. Xahiş edirəm hamımız əlimizi vicdanımızın üstünə qoyub cavab verək. 2025-ci ildə belə vəhşiliyin qanuni əsası ola bilərmi? Amma bəşəriyyətin bu biabırçı mənzərəsi 23 aydır Qəzzada hər gün təkrarlanır. 365 kvadratkilometr ərazidə yaşayan 2,5 milyon qəzzalı hər gün əzilir. Onlar hər gün başqa bölgəyə köçməyə məcbur edilir”.
Ərdoğanın sözlərinə görə, Qəzzanın səhiyyə infrastrukturu tamamilə dağılıb: “Həkimlər öldürülüb və ya saxlanılıb. Təcili yardım maşınlarına atəş açılıb. Xəstəxanalar bombalanıb. Onlar məhv edilib. Müalicə mümkün deyil. Cərrahiyyə mümkün deyil. Dərman tapmaq mümkün deyil. Rəcəb Tayyib Ərdoğan olaraq bunu ürək ağrısı və kədər göz yaşları ilə deyirəm. Təəssüf ki, bu gün Qəzzada cəmi 2-3 yaşlı günahsız, əli, qolu, ayağı olmayan uşaqlar adi bir mənzərəyə çevrilib. Buna hansı vicdan dözə bilər? Hansı vicdan səssiz qala bilər? Uşaqların aclıqdan və dərmansızlıqdan öldüyü dünyada sülh ola bilərmi? Biz hamımız valideynik. Bizim əzizlədiyimiz övladlarımız, nəvələrimiz var. Burada, Amerikada, Avropada, dünyanın istənilən yerində uşağın əlinə kiçik tikan belə batarkən ürəyi ağrıyır. Amma Qəzzada uşaqların əlləri, qolları və ayaqları narkozsuz kəsilir. Bəşər tarixi ötən əsrdə belə bir vəhşilik görməmişdi”.
İbrahim Cəfərov
çap et