İnsanlar adətən ömrün ahıl çağında çevrilib arxaya boylanır, keçdiyi həyat yoluna nəzər salır, olub-keçənləri təhlil edir, bir sözlə, öz-özünə hesabat verir. Mən də ömrümün yetmiş ili ərəfəsində istədim ki, ötüb- keçdiyim yola nəzər salım, olub- keçənləri xatırlayım. Və bu xatırlamalar fonunda Vətən, xalq, rastlaşdığım insanlar haqqında fikirlərimi oxucularla bölüşüm.
Azərbaycanın dilbər guşələrindən olan Balakən rayonunun Katex kəndində doğulmuşam. Bu kənd qədim yaşayış məskənlərindən biri olub. Buranın mehriban, zəhmətkeş insanları mənim sonrakı taleyimdə çox əhəmiyyətli rol oynayıblar. Doğrudan da, bu camaat Vətəni, xalqı öz varlıqları qədər sevən, nikbin ruhlu insanlardır. İndi mənə dərs verən müəllimlərimi böyük ehtiramla yad edirəm. Onlar Sovet dönəmində yaşasalar da, hələ o vaxt Azərbaycanın azadlığa çıxacağından, müstəqilliyə qovuşacağından açıq, böyük yanğı ilə danışardılar. O, vaxtdan qəlbimdə qorxmazlıq, azadlıq ruhu yaranmışdı. Və bir gün bu xalqın qaniçən imperiyaya qarşı qalxan mübarizləri sırasında özümü də görəndə necə xoşbəxt olduğumu təsəvvür etmək çətindir.
Mən iqtisadiyyat sahəsinin mütəxəssisiyəm. Yaxşı bilirdim ki, bu torpağın yeraltı, yerüstü sərvətləri talan edilir, bizə isə yalnız onların tör-töküntüsü qalır. Azadlıq mübarizəsi başlayanda çoxları deyirdi ki, Azərbaycan heç zaman müstəqil yaşaya bilməz. Amma bu gün müstəqil Azərbaycanımız nəinki azad yaşayır, eyni zamanda, öz inkişaf sürətinə görə dünyanın qabaqcıl ölkələri sırasındadır.
Amma bu müstəqillik asan qazanılmadı. Nə qədər itkilərimiz oldu. 20 Yanvar gecəsi imperiya ölkəmizə görünməmiş təcavüz etdi. Çox fəxr edirəm ki, o ağrılı günlərdə mən də qəhrəman oğullarımızla bir yerdə olmuşam. Bu gün Şəhidlər Xiyabanında dəfn olunan bu insanları ziyarət edərkən adam, həqiqətən, qürur, fəxarət hissi keçirir.
Hələ, sən demə, qarşıda bizi daha böyük fəlakətlər gözləyirmiş. Dağlıq Qarabağ müharibəsi bizi əsl imtahana çəkdi. Nə qədər insanlar yurd-yuvalarından didərgin düşdü, torpaqlarımız işğal olundu. Müstəqil Azərbaycanımızın taleyi təhlükə altında olduğu bir vaxtda ulu öndərin hakimiyyətə gəlişi Azərbaycanı dağılmaq təhlükəsindən xilas etdi.
Müharibə isə davam edirdi. Özümü xoşbəxt sayıram ki, mən də torpaqlarımızın azadlığı yolundakı bu müharibənin iştirakçısı olmuşam.
...1992-ci ilin sentyabr ayının doqquzu idi. Qapı döyüldü, gələn polis bildirdi ki, hərbi kommissarlığa çağrılırsan. Sonra isə Ağdərə döyüşləri. Cəbhədə, döyüşlərdə keçirdiyim ayları ömrümün ən şərəfli anları hesab edirəm. Alay komandiri idim. Ağdərədə bir neçə kənd uğrunda gedən amansız döyüşlərdə əsgərlərimiz böyük qəhrəmanlıq göstərdilər. Koçekot, Çıldıran, Sırxavənd kəndləri uğrundakı döyüşlərdə itkilərimiz çox olsa da, biz Vəndə qədər irəliləyə bildik. Burada isə hər tərəfdən mühasirəyə düşdük. Çətin günlər idi. Amma uşaqlar döyüşdən çəkilmək istəmirdilər. Bir əsgər var idi, Şirin Saramanov. Qorxu nə olduğunu bilməzdi. Mühasirədən çıxmaq üçün apardığımız döyüşlərdə onu itirdik. Elə onun dostu Saşa da şəhid oldu. Amma mühasirəni yardıqdan sonra məlum oldu ki, bizə köməyə gəlməli olan batalyon gəlib çıxmayıb. O, vaxt belə hadisələr olurdu, çünki vahid komandanlıq yox idi. Orduda da hərc-mərcilik yaranmışdı.
Bu gün, Allaha şükür ki, atəşkəsdir. Amma cənab Prezidentin dediyi kimi, biz istəyirik torpaqlarımız sülh yolu ilə, beynəlxalq hüquq normalarına uyğun olaraq qeyd- şərtsiz azad olunsun. Əgər bu baş tutmasa, ordumuz torpaqlarımızı azad etməyə hazırdır. Bu gün hər bir döyüş qabiliyyətli Azərbaycan övladı torpaqlarımız uğrunda döyüşə hazırdır. Bizim müasir silahlarla təchiz edilmiş ordumuz Baş Komandanın döyüş əmrini gözləyir.
Ömrümün bu çağında Vətənimi belə qüdrətli görəndə qəlbim dağa dönür. Bir Bakıya baxın, necə də gözəlləşib. Təkcə Bakımı? Yox, bütün Azərbaycan yeniləşir, hər şey yaxşılığa doğru dəyişir. Və inanıram ki, ölkə başçımızın həyata keçirdiyi davamlı islahatlar Azərbaycanımızın müstəqilliyini daha da möhkəmləndirəcək, onu dünyanın inkişaf etmiş ölkələri sırasına çıxaracaq. Və mənim də ən böyük arzum Böyük Qələbə Gününü görməkdir.
Məhəmməd QARDAŞOV
Təqaüddə olan müharibə veteranı
çap et