Azərbaycan Dövlət İqtisad Universitetinin rektoru, professor Ədalət Muradovun və MBA Departamentinin direktoru dosent Nazim Hacıyevin “The impact assessment of investment on economic growth in competitive conditions in the Republic of Azerbaijan” adlı elmi məqaləsi “Global journal for research analysis” (IMPACT 3,1218) jurnalında çap edilib.
Universitetdən 525.az-a verilən məlumata görə, məqalədə Azərbaycan iqtisadiyyatının statistik məlumatları əsasında Keyns tipli istehlak funksiyasının parametrləri ekonometrik olaraq qiymətləndirilib. Başqa sözlə, istehlaka son hədd meylliliyi tapılaraq avtonom investisiyaların artımının ÜDM-ə təsirini əks etdirən multiplikator müəyyənləşdirilibdir.
Müəyyən olunub ki, istehlaka son hədd meyliliyi azaldığında multiplikatorun qiyməti də aşağı düşür. Daha sonra akseleratorun qiyməti müəyyən olunaraq təhlillər aparılıb. Təhlilin nəticəsi göstərdi ki, istehlaka meylliliyin aşağı düşməsinə baxmayaraq (multiplikativ effektin azalması), akseleratorun qiyməti artmayıb.
Multiplikator və akseleratorun qarşılıqlı təsir modeli əsasında müəyyən edilib ki, multiplikator və akseleratorun mövcud qiymətləri ÜDM-in tərəddüdlü artımına gətirib çıxara bilər.
Məqalənin sonunda ÜDM-in tarazlı artımının yaradılması üçün multiplikator və akseleratorun zəruri qiymətləri verilib və onun əldə olunması istiqamətləri göstərilib.
çap et