525.Az

Mirzə Ələkbər Sabir Berlində xatırlanıb

Almaniyadakı Azərbaycanlıların Koordinasiya Mərkəzinin (AAKM) təşkilatçılığı ilə Berlindəki “Ədəbiyyat evi”ndə dahi şair, “Molla Nəsrəddin” jurnalının yaradıcılarından və Azərbaycanda satira janrının banilərindən biri – Mirzə Ələkbər Sabirin 150 illik yubileyi qeyd edilib. “AvroQafqAsiya” Beynəlxalq Mədəniyyət və Elm Cəmiyyəti ilə birgə əməkdaşlıq çərçivəsində və Avropa Azərbaycanlıları Konqresinin dəstəyi ilə təşkil edilən “Mirzə Ələkbər Sabir–150” adlı ədəbi-bədii gecə alman ictimaiyyətinin diqqətinə təqdim edilən ilk təşəbbüs olub.

AAKM-dan verilən məlumata görə, tədbirdə Berlində yaşayan yazıçı və M.Ə.Sabir yaradıcılığının tədqiqatçısı Məmmədəli Hüseyninin təşəbbüsü ilə hazırlanmış sərgi nümayiş etdirilib və böyük maraqla qarşılanıb. AAKM-in icraçı direktoru Samirə Patser-İsmayılova tədbiri açaraq qonaqları salamlayaraq Azərbaycan və ölkəmizin mədəni həyatı haqqında qısa məlumat verib, Sabir yaradıcılığının Azərbaycan ədəbiyyatının və satira janrının inkişafındakı rolunu diqqətə çatdırıb. İcraçı direktor daha sonra qonaqları tədbirin proqramı və gedişatı ilə tanış edib. Ölkəmizin Berlindəki səfirliyinin müşaviri Rizvan Nəbiyev Almaniyada təkcə Azərbaycanın siyasətinin, musiqi və rəssamlıq sənətinin deyil, həm də ədəbiyyatının və onun nümayəndələrinin tanıdılması ilə bağlı tədbirlərin keçirilməsinin təqdirəlayiq olduğunu bildirib.

Berlin Humboldt Universitetinin Azərbaycan tarixi kafedrasının rəhbəri, “AvroQafqAsiya” Beynəlxalq Mədəniyyət və Elm Cəmiyyətinin sədri, professor-doktor Eva-Maria Aux “Sabir dövrü” adlı giriş məruzəsində o dövrdə maarifçiliyin inkişafından danışıb.

Sonra Üzeyir Hacıbəylinin “Arşın mal alan” filmindən “Molla Nəsrəddin” jurnalı və onun əməkdaşları ilə bağlı səhnələr nümayiş etdirilib. Naxçıvan Dövlət Universitetinin tarixi filologiya fakültəsinin dekanı, professor İman Cəfərov “Mirzə Ələkbər Sabir yaradıcılığında Qərb-Şərq ədəbi formalarının kontaminasiyası”, M.Ə.Sabir yaradıcılığının tədqiqatçısı Məmmədəli Hüseyni “Molla Nəsrəddin məktəbi” və Humboldt Universitetinin elmi işçisi, doktor Rüfət Səttarov “Mirzə Ələkbər Sabir dövründə dini müzakirələr” mövzularında məruzələr təqdim ediblər. Professor-doktor Eva-Maria Aux Özbəkistanda rus dilində nəşr olunmuş “Qafqazda və Mərkəzi Asiyada ictimai-mədəni maarifçiliyin tarixi. XIX və XX əsrin əvvəli” və 2011-ci ildə İsveçrədəki “Ringier” nəşriyyatında ingilis dilində nəşr olunmuş “Molla Nasreddin: the magazine that would’ve could’ve should’ve“ adlı kitabları təqdim edərək onlar haqqında məlumat verib. Daha sonra Məmmədəli bəy Hüseyni M.Ə.Sabirin “Hophopnamə” kitabından şeirlər oxuyub və Humboldt Universitetinin elmi əməkdaşı, doktor Rasim Mirzəyev şeirlərin alman dilində izahlı tərcüməsini qonaqlara çatdırıb.

Ədəbi-bədii gecənin qonaqları oxunan şeirlərə dair “Molla Nəsrəddin” jurnalında dərc edilmiş karikaturalara baxıblar. Tədbirin sonunda AAKM-in icraçı direktoru Samirə Patser-İsmayılova qonaqlara və tədbirin digər təşkilatçılarına təşəkkürünü bildirib. Sonda tədbirin iştirakçıları M.Ə.Sabir yaradıcılığının tədqiqatçısı Məmmədəli Hüseyninin şəxsi arxivindən təqdim etdiyi və “Molla Nəsrəddin”çilərin fəaliyyətini geniş şəkildə əks etdirən sərgiyə baxıblar.

S.MÜRVƏTQIZI

12.12.2012

çap et