Bu gözəl, çox fəal və həyatsevər qadınla biz onun öz qəzeti üçün yer icarəyə götürdüyü “Ayna-Zerkalo” nəşriyyat evində tanış olduq. 2000-ci ildə Lalə Abbasova qısa müddət ərzində paytaxt qadınları arasında populyarlıq qazanmış həftəlik “Qadın dünyası” qəzetini təsis etdi. İndi Azərbaycanda çeşid-çeşid nəşr olunan və əsasən “zərif cins” nümayəndələrinin oxuduğu parlaq, gözəl jurnallar o vaxt hələ yox idi. 2000-ci illərin əvvəllərində Lalə Abbasovanın qəzeti qadınlar haqqında və qadınlar üçün dərc etdirdiyi çox maraqlı və səmimi materiallar sayəsində respublikanın dövri mətbuat axınında öz bənzərsiz yerini tutdu.
O vaxta qədər isə Lalə xanım Bakının aparıcı kütləvi informasiya vasitələrində çalışaraq böyük təcrübə qazanmışdı. 20 ildən artıq Azərbaycanın qocaman “Vışka” qəzetində işləmiş, eyni zamanda o vaxtlar populyar olan “Baku” qəzetinə reportaj və informasiyalar, həmçinin dövlət radiosunun türkcə proqramları üçün verilişlər hazırlayırdı. Bu səbəbdən o, qəzetin baş redaktoru vəzifəsinə sanballı peşəkar vərdiş və mətbuatda böyük iş təcrübəsiylə gəlmişdi.
Lalə Abbasova özündə həmişə təşkilatçılıq bacarığı hiss etmiş, özünü yeni keyfiyyətdə sınamaq, öz müstəqil nəşrini yaratmaq istəmişdir. Bundan əlavə, sosial təmayüllü ictimai fəaliyyət onu həmişə özünə çəkirdi. O vaxt respublikada problem çox, yoxsulluq səviyyəsi yüksək, sosial müdafiəsiz insanlar kifayət qədər idi. Doğulduğu yurdla heç zaman əlaqəsini kəsməyən, Xaçmaz əsilli Lalə Abbasova bu problemlərdən xəbərdar idi və o, bu insanlara nə yollasa yardım etmək, onların taleyində pozitiv surətdə iştirak etmək istəyirdi. Belə ki, “Qadın dünyası” qəzetiylə yanaşı Lalə Abbasova 2000-ci ildə bu nəşrin nəzdində yaratdığı Xeyriyyə Fonduna da rəhbərlik etdi. O vaxtdan redaktorluq və naşirliklə yanaşı Lalə xanım bu günəcən davam edən xeyriyyəçilik fəaliyyəti ilə də məşğuldur. Lalə Abbasova faktiki olaraq Azərbaycanda bu hərəkatın pionerlərindəndir, o, ətrafına bir qrup həmfikir qadın toplamış və onların köməyi sayəsində o illər üçün çox vacib, aktual aksiyalar keçirmişdir. Əvvəlcə Lalə Beynəlxalq Qadın Klubunun üzvləri ilə birlikdə Bakıdakı internatlara gedərək toplanmış maddi yardımı, geyim və ərzağı paylamışdır.
O, 2001-ci ildə ilk dəfə Qubanın Zərdabi kəndində ixtisaslaşdırılmış internat-məktəbdə olarkən bu internatın necə naqis vəziyyətdə olduğunu aşkarlamışdır - orada yoxsulluq, bit-birəyə gətirmiş anti-sanitariya hökm sürürdü. Bu zamana qədər Lalə xanımın içində kifayət qədər məşhur və maddi cəhətdən təminatlı qadınlar olan aktivi yaranmışdı. Onlar əlbir olaraq uşaqlara üst-baş, çarpayı, paltaryuyan maşın, t
elevizor, kompyuterlər almışlar. Lalə Abbasovanın müvafiq dövlət strukturlarına müraciətindən sonra 2005-ci ilədək Qubadakı internat-məktəbə partalar və avadanlıq verilmiş, “Azərsun holdinq” şirkətinin köməyilə isə mətbəx və sanitar qovşağı təmin edilmişdir. Bir neçə il ərzində bu internatdakı vəziyyət kökündən dəyişmişdir.
Bundan başqa bir neçə evsiz, valideyn himayəsindən məhrum qız Lalə Abbasovanın yardımı ilə layiqincə toy görmüş və hətta mənzil əldə etmişdir (Lalə xanım Quba internatındakı bir gənc ailəyə öz fəal qadınlarının və bu aksiyanı dəstəkləyən bir sıra yüksək vəzifəli məmurların köməyi ilə Xırdalandakı gənclik şəhərciyində üçotaqlı mənzil almışdır). Xaçmazdakı uşaqlara öz hesabına 30 əlil arabası alıb vermişdir. Deputatlığının bütün beş ili ərzində Lalə xanım tərəfindən bayram günlərində əlil uşaqları olan ailələrə ərzaq hədiyyələri göndərilmişdir. Qarabağ veteranı olan bir seçiciyə Lalə Abbasova və onun xeyriyyə işlərinə cəlb etdiyi sponsorlar sayəsində böyrək köçürülməsi əməliyyatı həyata keçirilmişdir və beləliklə cavan bir şəxs həyata qaytarılmışdır. Lalə xanımın bu cür xeyirxah əməllərindən kifayət qədər misal çəkmək olar...
İndi erkən çağlarından Lalə xanımla internatlara və uşaq evlərinə gedən qızları “Çıraq” gənclik xeyriyyə fondu yaradaraq analarının yolunu davam etdirirlər. Fond bir neçə - o cümlədən, Qubadakı və Şəkidəki internatlara yardım etmək fikrindədir. Bu gün Heydər Əliyev Fondunun və Fondun rəhbəri, ölkənin birinci xanımı Mehriban Əliyevanın sayəsində körpələr evi və internatların çoxunun əsas sosial problemləri həll edilmişdir. Buna görə mənəvi, psixoloji və intellektual dəstək ön plana çəkilir. Uşaq evləri və internatların gənc məzunları ali təhsil müəssisələrinə daxil olarkən, peşə seçərkən, iş axtararkən köməyə möhtac olurlar. “Çıraq” Fondunun yaradıcıları öz səylərini məhz bu istiqamətə yönəltmək niyyətindədirlər.
Bir dəfə hansısa məmur Lalə xanımdan təəccüblə soruşmuşdu:
- Bu sənin nəyinə lazımdır? - onun evsiz-eşiksizlərə yardım etmək üçün vəsait axtarışlarını nəzərdə tutmuşdu. - Elə bilirsən onlar buna görə sənə çox sağol deyəcəklər?
- Mənə “çox sağol” lazım deyil. Kiməsə kömək edə bildiyim üçün qəlbən məsud və rahatam, - cavabını vermişdi Lalə Abbasova. Bununla belə, o, heç vaxt öz aksiyalarını görk etmir və televiziya cəmi bir neçə dəfə bu tədbirləri işıqlandırıb.
lll
...Ümumiyyətlə XXI əsrin ilk onilliyi naşir, redaktor, nəhayət Milli Məclisin deputatı Lalə Abbasova üçün fəaliyyətinin ən məhsuldar mərhələsidir. Belə ki, 2001-2003-cü illər Lalə Abbasovanın rəhbərliyi altında “Azərbaycan qadınları. XX əsr” adlı üç ensiklopedik toplu işıq üzü gördü. Bu toplular dövlət strukturları və xarici səfirliklərin köməyilə dünyanın bir çox ölkələrinə göndərilmiş, planetin ən böyük kitabxanalarında layiqli yerini tutmuşdur. Üç dildə nəşr edilmiş ensiklopediyalar (Azərbaycan, rus, ingilis) Lalə Abbasovanın və onun kiçik kollektivinin müasir Azərbaycan qadını obrazının - istər alim, pedaqoq, tibb xadimi, istər siyasətçi və ictimai xadim olsun - təbliğinə böyük töhfəsidir. 2008-ci ildə Lalə xanım daha bir ensiklopediya çap etdirir: “Azərbaycan iqtisadçıları” və bunun da tirajı qısa müddətdə oxucularını tapır.
Naşir fəaliyyətindən başqa Lalə Abbasova özünü poeziya və nəsrdə, həmçinin orta musiqi təhsilinə malik olaraq lirik və vətənpərvərlik mövzularında mahnı yaradıcılığında sınayır. Onun artıq konsertlərdə, radio və televiziya efirində səslənən 12 mahnısı var. Və onun istedadının bu tərəfi az adama məlumdur, çünki q
eyri-adi yaradıcı enerjiyə malik olan, öz ətrafında ən müxtəlif insanları birləşdirə bilən, müasircəsinə kreativ Lalə xanım özünü “piar etməyi”, öz xidmətlərini nəzərə çarpdırmağı qətiyyən bacarmır.
2005-ci ildə o, kifayət qədər qısa müddət ərzində respublika və hətta beynəlxalq miqyasda bir çox yaddaqalan aksiyalar həyata keçirmiş “Qadın və Tərəqqi” qeyri-hökumət təşkilatını yaratdı. Bu aksiyalar sırasında “Qadınlara münasibətdə zorakılığa qarşı”, “Erkən nigahlara “yox” deyək”, “İcbari sığorta”, “QMO məhsullara “yox” deyək”, Dünya kinematoqrafında zorakılığın təbliğinə qarşı beynəlxalq konfrans və bir çox bu kimi layihələr var. Əlbəttə, bu aksiyalar mətbuatda və televiziyada işıqlandırılmışdır, lakin Lalə Abbasova üçün əsas bu deyildi. Əsas - onu narahat edən problemlərə baxışını ictimaiyyətə çatdırmaq və onların həll edilməsinə imkan daxilində öz töhfəsini vermək olmuşdur. Parlamentin III çağırışında Lalə xanım öz prinsipiallığı, vicdanlılığı, dairə seçicilərinin hüquqlarını fəal müdafiə etməsi ilə yadda qalıb. O, praktik olaraq hər ay, bəzən ayda iki dəfə Xaçmaza yollanır, bu və ya digər problemlə yerindəcə tanış olurdu ki, Bakıya qayıdarkən mütləq bunun həllinə kömək etsin. Seçicilər indiyə kimi ona müraciət edirlər və o, eks-deputat statusuna baxmayaraq, əvvəlkitək dərhal köməyə tələsir...
Mən Lalə Abbasovanın ölkəsini necə sevdiyini, vətənin uğurlarıyla necə fəxr etdiyini, Prezidentimiz İlham Əliyev haqqında necə hörmət və rəğbətlə danışdığını bilirəm. O, əsl vətənpərvərdir və bu xüsusiyyətini alovlu nitqlərdə yaxud camaat qarşısındakı çıxışlarında deyil, konkret işlərində və layihələrində büruzə verir.
Əlbəttə, hər bir yubiley - dayanmaq, arxaya nəzər salmaq, bəzi nəticələr çıxarmaq və sonrakı hərəkətin istiqamətini müəyyən etməyə bir macaldır. Lalə Abbasovanın keçdiyi yola nəzər salarkən inamla demək olar ki, bu yol bütün maneələrə və çətinliklərə baxmayaraq onun tərəfindən ləyaqətlə keçilib. Onun bu həyatda bütün etdikləri isə insanlara mehribanlığı, səmimiyyəti və intəhasız sevgisiylə şölələnib.
Deyirlər, hər bir, hətta ən dahi rəssamın şah əsəri onun uşaqlarıdır. Lalə xanım bu sarıdan da xoşbəxt insandır. Onun üç yetkin, tərbiyəli, ayaq üstə möhkəm duran övladı var və onlar Lalə xanımın həyatının əsas mahiyyətini, başlıca sərvətini təşkil edirlər.
Öz dostuma, tanınmış jurnalist, redaktor, naşirə bundan sonra da beləcə enerjili, güclü və kreativ olmağı arzulayıram. Əsas isə - onun hamımızın tanıdığı və sevdiyi Şəxsiyyət kimi qalmasıdır.
çap et