Qafqaz Universitetində Türkiyə Böyük Millət Məclisinin Zonquldağ millət vəkili Köksal Toptanla görüş keçirilib. Görüş onun Azərbaycana 2 günlük səfəri çərçivəsində baş tutub. Qeyd edək ki, səfərinin məqsədi Türkiyədə təhsil alan tələbələrin təhsil almalarının 20 illiyi münasibəti ilə keçirilən tədbirdə iştirak etməkdir.
Onun Qafqaz universitetinə gəlişi münasibətilə təhsil ocağının akt zalında görüş keçirilib.
Tədbiri giriş sözü ilə Qafqaz Universitetinin rektoru, professor Ahmet Saniç açdı və bu ali təhsil ocağının yaranmasından danışaraq bildirdi ki, 1993-cü ildən etibarən Ümummilli lider Heydər Əliyevin xeyir duası ilə fəaliyyətə başlayan universitetin ilk məzunları 1998-ci ildə olub. 2013-ci ildə isə Qafqaz Universiteti 15-ci məzuniyyətini keçirəcək. A.Saniç həmçinin onu da qeyd edib ki, artıq ikinci dəfədir ki, Türkiyə Böyük Millət Məclisinin Zonquldağ millət
vəkili Köksal Toptan Qafqaz Universitetində olur. Onun universitetə ilk gəlişi 2008-ci ilə təsadüf edib. Həmin görüşdə Köksal Toptana Qafqaz Universitetinin fəxri doktorluq diplomu ve doktorluq rütbəsi təqdim olunub. Rektor həmçinin bu görüşün də universitet üçün çox əhəmiyyətli və yaddaqalan olacağına əmin olduğunu bildirib.
Sonra Türkiyə Böyük Millət Məclisinin Zonquldağ millət vəkili Köksal Toptan çıxış edərək yenidən Qafqaz Universitetində olmağından, tələbə və müəllim heyəti qarşısında çıxış etməkdən məmnunluğunu ifadə edib. O, bildirib ki, universitetin malik olduğu müasir maddi-texniki baza, inşa olunmuş yeni tədris binaları iki qardaş ölkə arasında elmi-mədəni körpü rolunu oynayan universitetin gələcəyi baxımından böyük əhəmiyyət daşıyır: "Qafqaz Universiteti iki ölkə arasındakı dostluq, qardaşlıq və birliyin nümunəsi, parlaq rəmzidir". K.Toptan çıxışı zamanı universitetin inkişafı üçün hər cür qayğı və diqqət göstərən Azərbaycan Respublikasının Prezidenti İlham Əliyevə minnətdar olduğunu xüsusi vurğuladı . Son olaraq K.Toptan universitetin kollektivinə Azərbaycanın təhsil həyatına və iki qardaş ölkə
arasındakı əlaqələrin inkişafına yeni-yeni töhfələr verməsini arzuladı.
Tədbirin sonunda Çağ" Öyrətim İşlətmələri şirkətinin prezidenti Ənvər Özərən Köksal Toptana xatirə plaketi və hədiyyə təqdim etdi. Tədbirdə Türkiyə Böyük Millət Məclisinin Zonquldağ millət vəkili Köksal Toptanın Qafqaz Universitetinə ilk səfərindən hazırlanmış film nümayiş olundu. Görüşdən sonra Millət vəkili Köksal Toptan Qafqaz
Universitetinin yeni istifadəyə verilmiş İqtisadiyyat fakultəsinin binası ilə tanış oldu.
S.QARAYEVA
çap et