Ölkəmizdə, o cümlədən, onun bölgələrində çıxan qəzetlərin sayı kifayət qədərdir. Amma qəzetdən fərqli olaraq, hər nömrəsi yadigar kimi qala bilən jurnal nəşri xüsusən bölgələrdə asan iş deyil. Axı bunun üçün həm yerli materialların bolluğu, həm də naşirlərin peşəkarlığı şərtdir.
Regionlarımızda, o cümlədən, ikinci şəhərimizdə məlum dövlət proqramları sayəsində son onillikdə müşahidə olunan yüksəliş təzahürləri bu sahəyə də öz müsbət təsirini göstərib. Elə düz 10 il əvvəl iki gəncəli jurnalistin təşəbbüsü ilə nəşrinə başlanılan "Gəncə" jurnalı da bu yüksəlişin ilk qaranquşlarından olub. İlk sayı 2005-ci ilin sentyabrında "Gəncə-böyük hərflə" adı altında çıxan jurnal öz qarşısına milli-mənəvi dəyərlərimizin təbliği, şəhərin iqtisadi və mədəni inkişafının işıqlandırılması məqsədlərini qoyub.
"Gəncə ikinci şəhərimiz olmaqla yanaşı, Azərbaycan milli ruhunun aynası sayılan bir məkandır. Uzun illər ərzində bu şəhərdə dövri jurnal nəşrinin olmaması əlbəttə, qəbahətdoğurucu bir hal idi. Odur ki, 2004-cü ildə regionların sosial-iqtisadi inkişafı üzrə ilk Dövlət Proqramının qəbul olunması və onun bölgələrimizin mədəni səviyyəsinin yüksəldilməsinə aid müddəaları bu sahədəki boşluğun doldurulması üçün fəaliyyətə keçmək üçün bizə bir növ, çağırış oldu. Və dostum-həmkarım Zakir Muradovla birgə "Gəncənin jurnalı olmalıdır!" fikri ilə işə girişdik, tezliklə təşəbbüsümüz öz bəhrəsini verdi. Əsas məqsədimiz milli-mənəvi dəyərlərimizi, şəhərin mədəni mühitini işıqlandırmaq, Gəncəyə başucalığı gətirən adamları oxuculara, xüsusən gənc nəslə tanıtmaq olub"-deyə, jurnalın təsisçisi Elcan Oruclu bildirir.
Jurnalın indiyədək 40 nömrəsi işıq üzü görüb. Nəşr öz amalına sadiqlik nümayiş etdirərək, xalqımıza xas olan yüksək mənəvi keyfiyyətlərin təbliğatçısı olub və geniş oxucu kütləsinin rəğbətini qazanıb.
Zakir Muradov
Gəncə
çap et